Minister Gerlien Croes: AIOF ta crea espacio pa inversion duradero pa futuro di Aruba en general

Cu e tratamento y aprobacion di e prome presupuesto di Algemeen Investerings- en Ontwikkelingsfonds (AIOF) den Parlamento di Aruba, Gobierno di Aruba ta confirma un paso importante pa crea mas continuidad y structura den inversionnan publico cu ta necesario pa desaroyo di nos pais.

Minister di Relacionnan den Reino, Educacion, Hubentud, Innovacion y Deporte, sra. mr. Gerlien Croes, ta considera AIOF un instrumento importante pa por transforma prioridadnan di maneho den inversionnan concreto y duradero, particularmente den areanan manera educacion, deporte, hubentud, innovacion y facilidadnan cu ta contribui directamente na desaroyo y bienestar di comunidad.

“Inverti den educacion y deporte ta inverti den futuro di Aruba. Cu AIOF nos ta crea un oportunidad pa no solamente identifica loke mester mehora, sino pa planifica, financia y ehecuta inversionnan necesario riba un periodo di varios aña. Nos muchanan, hobennan, educadornan, atletanan y comunidad henter merece inversionnan cu ta sostene nan desaroyo y nan futuro,” Minister Gerlien Croes a expresa.

AIOF a wordo crea oficialmente mediante Landsverordening Algemeen Investerings- en Ontwikkelingsfonds dia 9 di juli 2026. E fondo ta destina pa financia inversionnan publico na beneficio di bienestar y desaroyo di Aruba y ta conecta cu un Agenda di Inversion Multianual. Esaki ta permiti cu proyectonan cu ta exigi preparacion, planificacion y ehecucion durante varios aña no ta limita na solamente un aña presupuestario.

Pa Ministerio di Relacionnan den Reino, Educacion, Hubentud, Innovacion y Deporte, e manera di planifica inversion riba termino mas largo ta di gran importancia. Aruba tin necesidad di sigui modernisa y mehora su facilidadnan educativo y deportivo entre otro, mientras cu simultaneamente ta crea condicionnan adecuado pa muchanan y hobennan por desaroya nan talento.

Minister Gerlien Croes ta enfatisa cu inversion den infrastructura no mester wordo mira simplemente como construccion of renobacion di un edificio of facilidad, sino como un inversion den hende.

Riba 6 di augustus 2026, Gobierno a entrega na Parlamento di Aruba e prome presupuesto di AIOF pa añanan 2026 y 2027. Como parti di e proceso parlamentario, Parlamento a presenta un total di 404 pregunta, cual Gobierno a contesta, sigui pa dos dia di tratamento amplio di e presupuesto den Parlamento.

Segun Minister Gerlien Croes, e proceso di pregunta, contestacion y debate ta un parti esencial di transparencia y rendicion di cuenta ora ta trata di inversion di fondo publico.

“Nos ta papia di inversionnan cu mester sirbi Aruba no solamente awe, sino pa añanan cu ta bin. P’esey ta importante cu cada proyecto tin un base solido, cu tin transparencia y cu Parlamento y comunidad por sigui di serca con e recursonan ta wordo inverti y cua resultado nan ta produci,” Minister Gerlien Croes a declara.

E introduccion di AIOF ta crea un structura pa conecta vision, presupuesto, planificacion y ehecucion riba varios aña. Pa Minister Gerlien Croes, esaki ta particularmente relevante den educacion y deporte por ehempel, dos pilar cu tin un impacto directo riba calidad di bida y futuro di Aruba.

E meta, segun Minister Gerlien Croes, no ta simplemente pa inverti mas, sino pa inverti cu vision, continuidad y resultado.

“Nos tin e responsabilidad pa prepara Aruba di mañan awe. Cada inversion cu nos haci den nos muchanan, nos hobennan, nos adultonan, nos comunidad den su totalidad, mester acerca nos na un Aruba cu ta brinda mas oportunidad pa cada ciudadano desaroya su potencial. AIOF ta un instrumento pa yuda transforma e vision ey den resultado concreto pa pueblo di Aruba,” Minister Gerlien Croes a conclui.