Con nos por uza transformacion digital pa brinda ciudadano un miho servicio? E pregunta aki tabata central durante e sesion di mainta di Aruba NEXT – Next Steps Forum, specialmente diseña y brinda na un grupo di funcionarionan publico. Bou di e tema “From Findings to Action”, e sesion a stimula reflexion riba con pa structura proyectonan di transformacion digital y kico ta haci un proyecto realmente transformador.
Aruba NEXT a conta cu dos sesion. E programa di mainta tabatin un enfoke specifico riba sector publico, cu e intencion pa stimula e proceso di pensamento necesario pa traduci estudionan, recomendacionnan y ambicionnan den mehoracionnan concreto. E evento aki a conta cu presentacion di Dr. Denyse White, un experto riba e tema di Transformacion Digital den aparato gubernamental.
Dr. White a duna su presentacion a base di un ‘pilot research’ riba e tema di Digital Economy, cual e organisacion ECLAC di Nacionnan Uni a presidi. E ta e intencion cu e resultadonan por sirbi como un ‘benchmark’ pa otro paisnan den e regionnan pa loke ta trata nan transformacion digital. E research aki tambe ta conta cu apoyo financiero di e comunidad eLAC, ECLAC Digital Transformation Lab y Cooperacion Aleman.
Durante e evento, Minister di Inovacion, sra. mr. Gerlien Croes, a enfatisa cu tur esnan involvi mester tin un entendimento comun di loke nos kier logra y con nos ta bay logra esaki. Mehora eficiencia pa funcionario ta importante, pero e meta ta inclui un miho calidad di servicio pa tur di nos como ciudadano.
Sr. Demetris Herakleous, Economic Affairs Officer di UN-ECLAC tambe a hiba algun palabra elaborando riba e colaboracion extenso y fructifero entre UN-ECLAC, Aruba y nos partnernan regional. Den pasado, UN-ECLAC tambe a yuda cu ‘research’ di Fintech.
Un meta comparti pa guia e transformacion
Un proyecto digital mester cuminsa cu claridad tocante e problema cu mester soluciona, e personanan cu e ta afecta y e resultado cu nan mester experencia.
Esaki por nifica menos documento pa entrega, menos necesidad di tuma tempo liber di trabou pa atende un tramite, un decision mas lihe of mas claridad tocante e progreso di un solicitud. Defini e resultadonan aki hunto ta yuda e partinan envolvi pa tuma decision cu ta contribui na e mesun meta. Simplemente copia un procedemento existente den un formato digital por mantene e mesun pasonan innecesario y e mesun carga pa ciudadano.
“Prome cu nos scoge un solucion, nos mester ta preciso tocante e problema, e personanan cu e ta afecta y e mehoracion cu nos kier nan experencia,” e Minister a expresa.
e-Government y e Transformacion Digital na Aruba
Durante e evento, Sr. Jeremy Erasmus tambe a elabora riba e desaroyonan di e-government. E acercamento aki ta forma parti di e programa di e-government di Aruba, pa cual informacion y ‘capacity building’ ta partinan importante den e maneho di cambio (“change management”).
Actualmente ta preparando implementacion di un proyecto piloto entre Censo, DIMAS y Departamento di Impuesto pa test con e institucionnan por intercambia data y verifica informacion di forma sigur via di un conexion central, pa propositonan defini. Pensa address (cambio), informacion di registro di persona, verificacion di entrada, tur ta ehempel di data cu tin proposito defeni, cu mester ser intercambia entre institutonan. Esakinan, entre otro, lo forma un base pa desaroya e arkitectura y proceso di servicio digital necesario.
“Un proyecto digital ta manera traha un cas. Bo tin mester di e arkitectura, sa ki e capacidad di carga mester ta etc. Pero un cas bo por wak e ta bay ariba, bloki pa bloki. Proyectonan digital bo no ta mira te ora e ta cla. Djis pasobra no por mira nada, no kiermen cu nada ta pasando.” – Jeremy Erasmus.
E experencia di e proyecto piloto mester contribui na modelonan di referencia, standardnan comun y maneho cu otro departamentonan por aplica den nan transformacion digital.
Coordinacion, capacidad y continuidad
Pa logra e transformacion, ta necesario pa tene cuenta cu diferente nivel di preparacion entre departamentonan y hendenan. Algun lo tin mester di apoyo, mientras otro por ta cla acapara e sistemanan nobo mas pronto. Planificacion financiero tambe mester forma parti di cada proyecto for di principio, incluyendo recurso pa mantencion, siguridad, capacitacion y continuidad di servicio.
Minister Gerlien Croes a gradici e organisacion UN-ECLAC pa nan apoyo continuo. E contribucionnan tocante fintech, economia digital, cybersecurity, etica di inteligencia artificial ta yuda amplia e base di conocemento pa Aruba su siguiente pasonan.
E meta comparti ta pa transforma e conocemento aki den decisionnan y accionnan cu tur ciudadano por sinti den e calidad di servicio cu e lo ricibi den futuro.










