Diaranson mainta a tuma luga e Congreso pa Educador, organisa pa Fundacion Autismo Aruba (FAA) conhuntamente cu Comision Nacional di Autismo, den cuadro di Learning Cities Aruba – Hunto nos TUR ta crece. Un dia dedica na conocemento, concientisacion y fortalecemento di educadornan y profesionalnan cu diariamente ta guia nos muchanan di 0-6 aña durante nan prome añanan di desaroyo.
Minister di Educacion, sra. mr. Gerlien Croes, a efectua apertura oficial di e congreso y a expresa su profundo aprecio na Fundacion Autismo Aruba, Comision Nacional di Autismo, educadornan, profesionalnan y tur partner cu ta contribui pa crea mas conocemento y comprension rond autismo na Aruba.
E congreso a reuni principalmente maestronan y profesionalnan cu ta traha cu muchanan di 0 te cu 6 aña. Durante e programa, diferente experto a comparti conocemento y hermentnan practico riba temanan manera señalamento trempan di autismo, stimulacion y intervencion na tempo, participacion di mayornan, diagnostico, regulacion emocional, bienestar di docente, Trastorno di Desaroyo di Idioma (TOS) y sosten dentro di e ambiente escolar.
Segun Minister Gerlien Croes, e importancia di un congreso manera esaki ta bay mucho mas leu cu solamente adkiri conocemento nobo. E ta fortalece e capacidad pa mira cada mucha como individuo y pa comprende cu cada uno por tin un manera diferente di comunica, siña y experimenta e mundo rond di dje.
“Educacion inclusivo ta cuminsa cu comprension. Ora nos duna nos educadornan mas conocemento y hermentnan, nos ta duna nan mas oportunidad pa reconoce e necesidad di cada mucha y guia nan di e manera cu nan merece. Cada mucha tin talento, cada mucha tin potencial y cada mucha merece un oportunidad pa florece,” Minister Gerlien Croes a expresa.
E minister a dedica palabranan special di reconocemento na educadornan presente. Segun Minister Gerlien Croes, nan compromiso pa sigui siña y profundisa nan conocemento ta mustra e responsabilidad grandi cu nan ta carga diariamente den formacion y bienestar di nos muchanan.
“Na tur nos educadornan: boso trabou ta haci diferencia. Boso ta mira nos muchanan diariamente, boso ta observa nan progreso y hopi biaha boso ta entre e prome personanan cu por identifica cu un mucha tin necesidad di sosten adicional. Boso dedicacion, pasenshi y deseo pa sigui siña merece nos reconocemento y nos gratitud,” Minister Gerlien Croes a declara.
Un gradicimento special a bay tambe na Fundacion Autismo Aruba y Comision Nacional di Autismo pa nan iniciativa y compromiso continuo pa aumenta concientisacion, comparti conocemento y fortalece sosten pa muchanan cu autismo, nan famianan y e profesionalnan rond di nan.
E congreso a conta ademas cu colaboracion di diferente partner y instancia cu ta activo den salud, cuido social y desaroyo di mucha, entre otro Fundacion Autismo Aruba, MDC, Wit Gele Kruis (WGK), Departamento di Salud Publico (DVG), Hunto Foundation, Fundacion Respetami, Respaldo, FEPOH, Departamento di Asunto Social y Fundacion Pa Nos Muchanan.
Minister Gerlien Croes a destaca cu precisamente e cooperacion entre educacion, salud, cuido social, organisacionnan y famia ta esencial pa brinda un sosten mas completo na cada mucha.
“Ningun educador, famia of organisacion mester haci esaki su so. Ta ora conocemento, experiencia y compromiso bin hunto cu nos por crea e ambiente caminda cada mucha por sinti cu e ta comprendi, acepta y sosteni. Esaki ta e forsa di traha hunto,” Minister Gerlien Croes a enfatisa.
E Congreso pa Educador ta alinea cu e vision di Learning Cities Aruba, caminda siñamento no ta limita na klas of na un etapa specifico di bida, sino ta un proceso continuo di crecemento, intercambio di conocemento y fortalecemento profesional.
Minister Gerlien Croes a conclui cu un palabra di aprecio na tur esnan cu a haci e congreso posibel y specialmente na e profesionalnan cu a dedica nan dia pa sigui amplia nan conocemento.
“Ora un educador crece, un mucha ta haya mas oportunidad pa crece. Ora nos comparti conocemento, nos ta fortalece nos comunidad. Y ora nos traha hunto pa compronde cada mucha, nos ta construi un educacion caminda berdaderamente tin espacio pa nos TUR.
Masha danki na Fundacion Autismo Aruba, Comision Nacional di Autismo, tur partner y principalmente nos educadornan. Sigui siña, sigui inspira y sigui haci diferencia den bida di nos muchanan,” Minister Gerlien Croes a finalisa.
