Dialuna dia 5 di mei, Minister di Relacionnan di Reino Gerlien Croes, hunto cu Prome Minister Mike Eman, a reuni cu miembronan di e Vaste Commissie di Tweede Kamer pa Relacionnan di Reino, den cual a trata temanan relevante pa e desaroyo di Aruba den un contexto regional y di Reino.
Durante e dialogo, e papia riba varios tema manera educacion y desaroyo na Aruba, pero tambe riba e situacion actual di migracion. E Comision a mustra hopi interes riba e problematica di migracion.
Ademas, a trata e tema di Rijkswet, un punto central den relacion legislativo entre e islanan y Hulanda. E Comision a expresa interes den e perspectiva y ambicionnan di Aruba, particularmente den e contexto di reforma administrativo, transparencia y bon gobernacion. Aruba ta activamente bezig cu implementacion di un “Codigo di bon gobernacion”, y e delegacion a ricibi esaki cu interes y aprecio.
Minister Gerlien Croes a subraya cu e reunion, e prome cu e Comision Fiho desde e huramentacion di e ministernan di Gabinete AVP-Futuro, a tuma luga den un ambiente constructivo y cu respet mutuo.
Segun Minister Croes, e envolvimento di e miembronan di Tweede Kamer ta evidencia cu Aruba tin un rol importante den e dialogo strategico, y cu tin un deseo comun pa fortalece e lasonan cu durante e ultimo añanan a bay perdi. E intencion ta cla: crea, fortalece y mantene e relacionnan den Reino riba un base di igualdad y respet mutuo.
