Ministerio di Educacion, DEA y scolnan MAVO ta profundisa dialogo nacional pa modernisa curiculo y fortalece calidad di educacion
Den cuadro di Learning Cities Aruba, Ministerio di Educacion, den colaboracion cu Departamento di Enseñansa Aruba (DEA), a continua cu e di dos sesion di Nationale Dialoog AVO/MAVO op Aruba, cu participacion di directornan y docentenan di scolnan MAVO.
E encuentro ta forma parti di un proceso di consulta enfoca riba evaluacion di e maneho actual, modernisacion di curiculo y fortalecemento di calidad di educacion secundario. E meta ta pa identifica mehoracionnan cu ta responde na e necesidadnan di nos studiantenan y e desafionan di educacion moderno.
Minister di Educacion, sra. mr. Gerlien Croes, a destaca e importancia di involucra profesionalnan educativo directamente den e proceso di desaroyo di maneho.
“Pa logra cambionan significativo den educacion, nos mester conta cu e experencia y conocemento di esnan cu diariamente ta den klas y na cabes di nos scolnan. Nan perspectiva ta indispensable pa identifica e retonan existente y desaroya solucionnan cu realmente ta funciona den practica,” Minister Gerlien Croes a expresa.
Un acercamento conhunto pa modernisa enseñansa MAVO
Durante e sesion, e participantenan a intercambia ideanan tocante e alineacion di maneho entre scolnan, e proceso di revisie y e posibilidadnan pa adapta curiculo na e exigencianan actual di sociedad y mercado laboral.
E combersacionnan a pone enfasis riba e importancia di claridad den e maneho educativo, consistencia den su aplicacion y un trayectoria di siñamento cu ta brinda studiantenan un base solido pa nan siguiente paso academico of profesional.
“Nos kier prepara nos hobennan pa un mundo cu ta evoluciona constantemente. Esaki ta exigi cu nos mester evalua nos metodonan, actualisa nos curiculo y garantisa cu cada studiante tin e oportunidad pa desaroya su potencial. E futuro di educacion mester wordo construi cu vision, pero tambe cu un bon entendemento di e realidad den nos scolnan,” e minister a indica.
Di intercambio di ideanan pa accion concreto
E dialogo nacional ta brinda un plataforma pa directornan, docentenan y representantenan di DEA comparti experencia y formula recomendacionnan pa futuro di enseñansa MAVO.
E aportenan di e participantenan lo sirbi como instrumento pa e siguiente pasonan den e proceso di evaluacion y fortalecemento di maneho. E intencion ta pa e resultadonan di e consultanan contribui na decisionnan fundamental y mehoracionnan sostenibel.
E iniciativa ta conecta cu e vision di Learning Cities Aruba, cu ta promove cooperacion, innovacion y siñamento continuo como elementonan esencial pa desaroyo educativo di nos pais.
Segun Minister Gerlien Croes, un sistema educativo fuerte ta rekeri no solamente un vision cla, sino tambe participacion activo di tur esnan involucra y e disposicion pa adapta na necesidadnan nobo.
Compromiso cu calidad y oportunidad pa cada studiante
Minister Gerlien Croes a expresa su aprecio na Departamento di Enseñansa Aruba y na tur director y docente cu a participa den e sesion, reconociendo nan dedicacion y contribucion profesional.
“Mi ta gradici cada participante pa nan dedicacion, compromiso y aporte valioso. E proceso aki ta demostra cu nos tin un meta comparti: un enseñansa MAVO di calidad, cu ta brinda nos studiantenan e preparacion y oportunidadnan necesario pa sigui avansa.
Nos responsabilidad ta pa transforma e ideanan aki den pasonan concreto, teniendo semper e interes di nos muchanan y hobennan como prioridad. Pasobra un inversion den calidad di educacion ta un inversion den futuro di Aruba,” Minister Gerlien Croes a conclui.
