Como Minister di Deporte, sra. mr. Gerlien Croes, ta mira cu gran satisfaccion riba e serie di encuentronan y reunionnan exitoso cu a tuma luga recientemente na Aruba cu representantenan di Comite Olimpico Arubano (COA) y Panam Sports.
Durante e bishita, a sostene dialogonan ameno y fructifero cu enfoke riba desaroyo di deporte na nos isla, unda a explora diferente ideanan y oportunidadnan concreto pa sigui eleva e nivel deportivo y amplia e posibilidadnan pa nos atletanan.
Panam Sports, representa pa su Presidente Neven Ilic y Secretaria General Jimena SaldaƱa, a expresa nan disposicion firme pa colabora estrechamente cu Gobierno di Aruba y COA. E compromiso aki ta representa un paso importante pa impulsa progreso y fortalece e ecosistema deportivo na Aruba y den region.
Un momento historico pa Aruba tabata e hecho cu pa prome biaha nos pais a wordo selectra y tabata anfitrion di e reunion di Comite Ehecutivo di Panam Sports, unda tur 30 miembro di e comite a reuni na Aruba pa delibera riba direccion y maneho di deporte den continente Americano.
Durante apertura di e reunionnan, Minister Gerlien Croes tabata tin e honor di hiba palabra, compartiendo su vision riba colaboracion regional y e importancia di crea oportunidadnan pa desaroyo deportivo sostenibel. E encuentro cu lidernan di deporte di henter region a facilita un intercambio valioso di experencia y ideanan pa fortalece e posicion di deporte tanto na Aruba como den nos continente.
āE bishita aki a confirma cu colaboracion y conexion internacional ta clave pa progreso. Nos ta comprometi pa sigui traha hunto cu partnernan strategico pa crea un ambiente unda nos atletanan por crece, desaroya y representa Aruba cu orguyo riba tarima internacionalā.
Minister Gerlien Croes a expresa su gradicimento na COA, Panam Sports y tur esnan cu a contribui na e exito di e encuentro aki, resaltando cu e confianza poni den Aruba como anfitrion ta un reconocemento di nos compromiso cu desaroyo deportivo.
Cu e reunionnan aki, Aruba ta reafirma su rol como un socio activo den region y ta sigui traha pa un futuro unda deporte ta sirbi como motor di desaroyo, union y oportunidad pa tur.
