Riba 17 di april 2026 a tuma luga den sala di Parlamento di Aruba un reunion publico riba e progreso di Landspakket Aruba. Miembronan di Parlamento di Aruba a wordo informa riba e resultadonan alcansa y e siguiente pasonan di e programa di reforma. E reunion a subraya e contribucion valioso cu Landspakket a brinda na fortalecemento di e resiliencia di economia y sociedad Arubiano.
Resultadonan visibel, consolidacion structural
Desde cu a firma riba 13 di november 2020, a tuma paso importante riba casi tur tema—di Kansspelautoriteit, Impuesto y Mercado Laboral te Economia, Cuido di Salud y Educacion. Tambe riba temanan manera e Sistema Nacional di Estadistica, ARUMIL, e funcion di IT y calidad di legislacion, ta logra resultadonan cu lo haci Aruba mas fuerte y prepara pa futuro. E progreso aki ta resultado di e esfuerso di programa-managernan, lidernan di proyecto y hopi empleado involucra, kende merece reconocimento special.
Di plan pa practica — y dilanti
Gobierno ta den un fase di transicion. “E pregunta no ta mas kiko nos kier cambia, sino con nos ta realisa, consolida y implementa e cambionan aki den practica,” segun Minister Gerlien Croes a expresa den su palabra di bonbini. E cooperacion entre Aruba y Hulanda, basa riba responsabilidad comparti, igualdad y interes comun, a wordo visibelmente fortaleci den e periodo cu a pasa.
Cu mira riba e resultadonan alcansa y e trabou cu ainda tin dilanti, gobierno ta mira padilanti riba un extension di e cooperacion. Un extension ta brinda e espacio necesario pa completa trayectonan cu ta den ehecucion, consolida reforma nan di forma structural y mantene e capacidad di implementacion di manera duradero. Esaki ta e siguiente paso logico pa continua cu confiansa e rumbo di modernisacion, bon gobernacion y resiliencia economico.
Landspakket a mustra su mes como un instrumento poderoso pa cambio. Gobierno ta expresa su aprecio pa tur esnan involucra y ta mira cu confiansa pa un siguiente fase, unda hunto cu Hulanda lo sigui construi riba e base aki. Pasobra e reforma nan di awe ta e resiliencia di mañan.
