Diadomingo ultimo, Minister Gerlien Croes den su calidad como Minister di Deporte, a atende cu gran placer e Feria Nacional 2025, bou di invitacion di Organisacion Caballista Arubano. Un evento cu a tuma luga den un ambiente deportivo entre atletanan cu pasion pa e deporte cabayista.
Durante e atardi aki, Minister Croes a presencia cu admiracion e emocionante competencia di “Jinetes y Amazonas”. E talento y disciplina cu e cabayistanan cuminsando for di 4 aña di edad a demostra tabata di aprecia.
Un di e momento mas honra pa Minister Croes tabata e ceremonia di premiacion, den cual e tabata tin e honor di otorga reconocimento na e cabayistanan cu a sobresali durante e competencia. E premiacion no tabata solamente un acto simbolico, pero e tabata un momento pa celebra e esfuersonan, dedicacion y amor pa e deporte cu e atleta cabayistanan ta entrega.
“Esaki ta mas cu un competencia. Esaki ta cultura, determinacion y un testimonio di locual nos por logra ora nos traha hunto, cu pasion y respet”, Minister Croes a expresa durante su discurso cortico. “Mi ta felicita di curason tur participante, ganadornan y tambe Organisacion Caballista Arubano pa un evento organisa cu exito y cu hopi amor pa deporte”.
Minister Croes a expresa su gradicimento na Organisacion Caballista Arubano, tanto pa e invitacion, como pa nan rol crucial den e organisacion di e Feria Nacional 2025. Minister a enfatisa cu actividadnan manera esaki ta fortalece nos identidad como pueblo y ta duna nos atletanan e ehempel di dedicacion, respet, disciplina y perseverancia.
“Pabien na tur cabayista”!
