Openbaar Avond Beroepsonderwijs Aruba (OABA) y Dienst Gevangeniswezen Aruba (DGWA) a formalisa un cooperacion strategico pa medio di un Memorandum of Understanding (MOU) na maart 2026. E acuerdo aki ta stipula un marco di cooperacion pa ofrece enseñansa profesional intermedio (MBO) oficialmente reconoci y dirigi riba diploma dentro di Instituto Coreccional Nacional (KIA).
Meta di e Programa
E obhetivo principal di e cooperacion aki ta pa organisa y ehecuta un programa di formacion piloto cu ta uza enseñansa profesional como un instrumento structural pa resocialisacion. Ambos partido ta reconoce cu enseñansa ta un instrumento esencial pa stimula participacion laboral y promove un reintegracion social sostenibel pa e detenidonan. Door di provee e participantenan cu habilidadnan profesional certifica, e iniciativa aki tin como meta pa desaroya nan capacidad profesional y brinda un instrumento structural pa rehabilitacion y reintegracion a largo plaso.
Actividadnan di e Programa y Structura di Les
E iniciativa piloto ta andando desde april 2026 cu diferente cursonan tecnico specifico den e ambiente coreccional. E actividadnan educativo tumando luga ta inclui:
- Formacion Specialisa: E formacion ta trata di programa manera “Asistente Metal, Electro y Instalacion”, cual ta un cualificacion di MBO Nivel 1 enfoca riba metal, electricidad y sistemanan di instalacion.
- Modelo di Enseñansa Hibrido: E lesnan ta wordo ofreci via un structura hibrido cu ta consisti di 50% educacion practico y 50% educacion online via un plataforma digital di enseñansa sigura.
- Ambientenan Flexibel: E actividadnan di enseñansa ta tuma luga principalmente dentro di ICN/KIA, of si ta necesario, na un localidad externo stipula den consulta mutuo.
Actualmente e participantenan ta trahando riba proyectonan concreto, manera fabrica hekwerknan pa scolnan. Esaki ta percura cu nan no ta solamente desaroya habilidadnan profesional, pero tambe ta contribui activamente na comunidad. E colaboracion aki ta unico y innovador, unda siguridad, calidad di educacion y impacto social ta bin hunto.
E progreso ta wordo evalua di cerca pa medio di un grupo di proyecto conhuntamente forma pa representantenan di tanto OABA como DGWA. E grupo aki lo reuni periodicamente pa vigila e progreso, evalua participacion y posibel dropout, garantisa calidad educativo, y resolve cualkier problema operacional. Na finalisa di e programa piloto, lo compila un rapport di evaluacion amplio pa asina e partidonan por dicidi riba continuacion, expansion, of un incorporacion structural di e programa.
E exito di e proyecto aki ta e resultado di un colaboracion fructifero entre Ministerio di Educacion y Ministerio di Husticia. Un palabra di gradicimento ta bai na Openbaar Avond Beroepsonderwijs Aruba (OABA) y Instituto Coreccional Nacional (KIA) pa nan compromiso y esfuerso den haci e iniciativa aki un realidad. Cu e iniciativa aki, Ministerio di Educacion a reforsa nan compromiso pa crea un sociedad mas inclusivo, unda oportunidad y desaroyo di e ser humano ta central.
