Den cuadro di su bishita oficial na Hulanda, Minister di Relacionnan den Reino, Educacion, Hubentud, Innovacion y Deporte, mr. Gerlien Croes, a realisa un serie di encuentro significativo cu a reforsa laso, inicia desaroyo deportivo y enfoka riba e importancia di nos studiantenan.
Minister Croes a cuminsa e prome dia oficial di agenda cu un bishita na Arubahuis, cede di e Gabinete di Aruba na Den Haag, pa cumpli cu su ronda di introduccion. Durante e reunion cu e personal y team di Arubahuis, a comparti pensamento, ideanan y fiha vision di e gabinete pa futuro. E intercambio a resulta productivo y inspirativo, y Minister a gradici cada un pa nan dedicacion y compromiso continuo.
Siguiendo cu e agenda di e dia, a tuma luga un reunion estrategico cu Berry van Driel di Koninklijke Nederlandse Baseball en Softball Bond, unda a wordo dialoga riba e apoyo tecnico cu Aruba lo ricibi pa impulsa e desaroyo di baseball y softball, tanto den infrastructura como den formacion di coaches, umpires y mas. Esaki ta un paso concreto pa eleva e nivel di deporte di baseball y softball riba nos isla.
E dia a termina cu un ‘Meet & Greet’ inspirativo na De Haagse Hogeschool na Den Haag, organisa conhuntamente cu Arubahuis. E evento a conta cu un cantidad record di atendencia di studiantenan Arubiano cu a biaha for di diferente ciudad, cu a participa activamente den un conversacion abiertamente riba topicanan importante manera vivienda, guia di mentor, seguro, ‘Arubalening’ y posibilidadnan laboral.
Minister Croes a expresa su orguyo pa e motivacion y madures cu e studiantenan a demostra, y a enfatisa cu Aruba ta depende di nan talento pa bolbe y sigui construi un pais cu mas oportunidad, conocimiento y union.
“Nos ta kere den boso. Aruba mester di boso. Hunto, nos ta traha riba un miho futuro pa Aruba.”
