Diaranson mainta, como Minister di Deporte, sra. mr. Gerlien Croes, a organisa un Sport Expo special na Centro Deportivo Libertador Betico Croes, den marco di bishita oficial di Prome Minister di Hulanda, sr. Rob Jetten. E evento a reuni deporte, salud y educacion, cu un enfoke riba nos mucha- y hobennan como futuro di Aruba.
Durante su bishita na e sport expo, Prome Minister Jetten a expresa su gratitud y felicidad di por conecta directamente cu nos hubentud—e generacion cu lo guia Aruba den futuro. E iniciativa aki a crea e espacio perfecto creando conexion entre mucha- y hobennan pero tambe deporte y educacion, reuniendo aproximadamente 150 mucha, for di scol preparatorio te enseñansa avansa, for di 16 scol, tur ta ganadornan durante Weganan Escolar y/of Weganan Interinsular.
E programa a inicia cu palabra di apertura, caminda Minister Gerlien Croes a enfatisa e importancia di inverti den hubentud, salud y movemento como base pa un sociedad fuerte. Despues, Prome Minister Jetten a dirigi palabra na e muchanan, cuminsando cu un caluroso “Bon dia” y resaltando cu deporte no solamente ta crea alegria y amistad, pero tambe ta contribui na salud y por habri oportunidad pa representa Aruba cu orguyo riba tarima internacional.
Un di e momentonan mas dinamico di e mainta tabata e sesion di “Beweeg Plezier”, unda durante 30 minuut e muchanan a participa activamente den diferente actividadnan deportivo. Prome Minister Jetten, hunto cu Minister Gerlien Croes como Minister di Deporte, a permanece banda di e canchanan, encurashando e muchanan. Specialmente e mas chikitonan, pa sigui participa cu entusiasmo, aun mas ora nan topa cu algun dificultad.
E evento aki tabata un exito, danki na e colaboracion estrecho entre ministerio di deporte, IBiSA y otro partnernan cu ta dedica nan trabou diario na desaroyo di nos muchanan. Preparacion y e weganan a wordo guia y ehecuta pa personal di IBiSA, bou guia di nan profesionalnan dedica.
Ademas, e programa a inclui un momento simbolico di entrega di e ‘wisselbeker’ di Weganan Interinsular 2026, caminda Aruba a wordo reconoci como ganado general—un logro cu ta reforsa e impacto positivo di deporte den nos comunidad.
Ademas, por medio di Weganan Interinsular, nos islanan ruman den Reino ta continua na traha hunto pa promove desaroyo deportivo entre nos mucha- y hobennan. E iniciativa aki no solamente ta fortalece competencia sano, pero tambe ta crea lasonan di amistad, intercambio di conocemento y colaboracion entre e islanan. Hunto, nos ta construi un base solido pa crecemento deportivo den region, duna nos hobennan e oportunidad pa desaroya nan talento y representa nan pais cu orguyo riba nivel local, regional y internacional.
Minister Gerlie Croes ta expresa su gradicimento na Prome Minister Rob Jetten pa su presencia y compromiso, y na tur esnan cu a contribui pa haci e evento aki un exito—organisadornan, partnernan, docente, cabesante y voluntario.
Mas importante ainda, Minister Gerlien Croes kier felicita nos muchanan. Nan energia, entusiasmo y dedicacion a mustra claramente cu deporte ta un instrumento poderoso pa forma caracter, disciplina y conexion.
E Sport Expo aki a confirma cu ora nos inverti den nos hubentud, nos ta inverti den futuro di Aruba.
Hunto, nos ta sigui construi un pais caminda deporte, salud y oportunidad ta na alcance di tur mucha—pa nan por crece, briya y lidera cu orguyo.
