Stichting Avondonderwijs Aruba (SAA – AvondMAVO), cu tin como meta principal pa ofrece adulto- y hobennan un di dos oportunidad pa obtene nan diploma di MAVO den un structura educativo, husto, motivante y efectivo, a anuncia un cambio structural grandi den su maneho pa e aña escolar 2026-2027. Cu e obhetivo pa reduci e cantidad halto di studiante cu ta stop cu nan estudio y pa engrandece e exito den estudio, e scol a dicidi di introduci un ‘Starttraject’ (trayecto di inicio) innovador.
E decision aki ta basa riba evaluacionnan reciente y un analisis di dato profundo, cual a mustra cu ‘Leerjaar 2’ tabata tin un porcentahe structuralmente halto di uitval (studiantenan cu ta bandona scol). Tradicionalmente, despues di e transicion di ‘fasttrack’ y e studiantenan cu ta stop durante aña, un tercera parti (1/3) so di e grupo original tabata resta of pasa pa e siguiente nivel. Esaki tabata nifica un rendimento hopi abou, locual a boga pa un revision fundamental di e structura actual y pa un guia mas intensivo pa e studiantenan.
Un chens husto pa tur studiante pa medio di e ‘Starttraject’
E ‘Starttraject’ nobo lo cuminsa hunto cu e aña escolar y lo dura te cu fin di november. Durante e periodo aki, tur studiante lo ricibi les directamente riba e nivel di ‘Leerjaar 3’, combina cu un ora di remediëring (guia y apoyo adicional) structuralmente inlcui den e orario paralelo pa tur studiante di e trayecto aki. Di e forma aki, e studiantenan ta haña un oportunidad husto pa demostra cu nan por maneha e nivel di MAVO, sin cu nan admision ta depende di un test di entrada (instaptoets), cual a wordo elimina pasobra e maneho nobo aki ta haci esaki innecesario. E unico rekisito di admision pa drenta e trayecto aki ta cu e studiante mester tin un edad minimo di 16 aña.
Na cuminsamento di december, e studiantenan cu cumpli cu e normanan di promocion stipula lo por pasa oficialmente pa Leerjaar 3. E normanan aki ta inclui: saca maximo un 5 (of dos 5 cu dos punto di compensacion), obtene e certificado di informatica, mantene un presencia minimo di 80% den les, y ricibi un conseho positivo di e docentenan. E studiantenan cu no logra e nivel rekeri na december por opta pa un trayecto di remediëring special entre januari y april, structuralmente diseña pa yuda nan pa toch por wordo admiti como studiante regular den e siguiente aña escolar. Pa e prome aña di implementacion, AvondMAVO a stipula un meta concreto cu por lo menos 40% di e studiantenan di e ‘Starttraject’ mester pasa exitosamente pa Leerjaar 3.
Cambio den maneho di dispensacion (vrijstellingen)
Den cuadro di e maneho nobo pa 2026-2027, AvondMAVO Aruba ta ahusta tambe e maneho di dispensacion pa materianan den Leerjaar 3. Anteriormente, un studiante por a haña dispensacion pa un materia pa e duracion di un aña escolar so si el a saca un 7 of mas halto den e aña anterior. Entrante e maneho nobo, e studiante lo por haña dispensacion caba ora e saca un 6, y e dispensacion aki lo ta valido pa dies (10) aña. Cu esaki, ta trece e maneho di Leerjaar 3 den liña cu e maneho existente di certificado di Leerjaar 4. E cambio aki tin como meta principal pa motiva e studiantenan pa sigui cu nan estudio, evitando cu nan ta sinti nan mes demotiva pa ripiti un materia unda nan a demostra caba di tin e nivel rekeri. Directiva di scol lo asumi un rol crucial den guia y conseha e studiantenan den e escogencia aki pa percura cu esaki ta cuadra miho cu nan perspectiva personal di examen.
Cu e cambionan aki, AvondMAVO Aruba ta scoge pa un entrada mas realista, motivante y enfoca riba resultadonan concreto. Manera directiva ta señala den su plan di maneho: “Cambio ta dificil na principio, complica den e fase intermedio, pero bunita na final”. E enfoke nobo aki ta cuadra miho cu e grupo como meta, ta engrandece e oportunidad pa progresa y ta reduci e abandono escolar structural, mientras ta mantene e calidad halto di educacion.
