Minister di Deporte, mr. Gerlien Croes, den un conferencia di prensa, a comparti e grato noticia cu despues di varios deliberacion, a dicidi pa habri Stadion Guillermo Prospero Trinidad temporalmente for di 7 di juni te 21 di juni pa e partidonan di futbol local y internacional cu ta programa.
Minister Gerlien Croes a subraya e importancia di duna sosten na e competencianan local y internacional cu tin cu tuma luga e dianan nos dilanti cu e meta pa mantene continuidad den e calendario deportivo di Aruba. Den coordinacion cu e teamnan tecnico relevante, e mandatario a evalua cu un apertura limita ta posibel durante e periodo di dos siman aki.
“E decision aki ta refleha nos compromiso cu e atletanan y comunidad deportivo,” Minister Croes a bisa. “Nos ta compronde cu e stadion tin un balor grandi pa nos comunidad y ta un simbolo di orguyo nacional y un espacio di competencia y union. Mientras cu e trabounan di renovacion lo continua despues di dia 21 di juni, nos ta duna e oportunidad pa e atletanan continua cu e weganan y pa pueblo disfruta di esakinan.”
Durante e reapertura temporal aki, lo tin medidanan di siguridad estricto na vigor, y e areanan cu ta bou renobacion lo keda cera pa garantisa siguridad di tur fanatico y atleta. Ministerio di Deporte ta haci un yamada na tur organisacion deportivo y fanatico pa respeta e reglanan vigente pa e periodo cu a habri e stadion temporalmente, pa siguridad di un y tur.
E apertura temporal ta resultado di un ronda largo di inventarisacion di e trabounan di e companianan y tur otro stakeholder y tambe colaboracion estrecho cu federacionnan deportivo. Minister Croes a reafirma cu e trabounan di renobacion lo continua di biaha despues di 21 di juni proximo.
