Dialuna 24 di november, Minister di Deporte, mr. Gerlien Croes, a tene un conferencia di prensa pa haci e anuncio oficial di e gran evento annual Premio Excelencia den Deporte (PED) 2024.
E evento lo tuma luga diabierna 28 di november 2025 y lo ta dedica na premia excelencia deportivo di e atletanan cu a wordo nomina por medio di nan federacion pa nan desempeño y resultadonan obteni durante e aña 2024.
Durante e conferencia di prensa, Minister Gerlien Croes a enfatisa e importancia di reconoce e trabou duro, disciplina y dedicacion di nos deportistanan, cu dia tras dia ta representa Aruba cu orguyo den diferente disciplina deportivo tanto local pero tambe internacionalmente.
Ademas di e anuncio oficial di PED 2024, Minister Gerlien Croes a probecha di e momento pa reconoce:
- 11 entrenador pa nan esfuerso, compromiso y pasion den guia y forma nos atletanan durante 2024.
- 8 baluarte den deporte, reconoci pa nan aportacion, resultado, dedicacion y amor pa deporte durante hopi aña.
E reconocementonan aki ta un forma di aprecio pa tur esnan cu a forma e base di e desaroyo deportivo na Aruba.
Durante e conferencia di prensa a presenta e Top 5 entrenadornan di aña cu a wordo premia, y tambe cu un descripcion mas amplio di e baluartenan cu a wordo honra durante pre-evento aki di PED 2024.
E entrenadornan cu a destaca den 2024 a haya nan certificado y medaya pa nan tremendo trabou den e aña deportivo 2024. E entrenadornan tur a wordo nomina pa nan respectivo federacion y e mihor 5 nan keda den persona di; Joally Joanne Lake, Luciano Mazzeo, Michael David Glennon Eights, Alexander Biesum y Sjurendi Eduviges Granviel.
Despues a sigui cu nos Baluartenan cu tambe a haya nan reconocemento mereci, nos baluartenan ta; Alex Tromp, Rudolph Simon, Octavio Croes, Milly Bagheri-van Trigt, Edna Maduro, Arturo Werleman, Jose Cornelio y Fabio Marcotulli.
Cu PED 2024, Aruba ta sigui fortalece e cultura di deporte, motivando e siguiente generacion di atleta y fortaleciendo e orguyo nacional mediante reconocemento di talento, perseverancia, disciplina y amor pa deporte.
Minister Gerlien Croes a conclui cu un yamada na comunidad pa sigui apoya y aporta na deporte local y celebra hunto e exito di nos atletanan, entrenadornan y baluartenan.
