Betico lo ta feliz pa wak con el a wordo recorda y su bida celebra.
Como yiu di Betico y Minister di Gobierno di Aruba, e ta un gran satisfaccion pa por a bishita diferente actividad relaciona cu e dia aki pa compaña nos pueblo den su añoransa pa e gran homber aki.
“Mi kier cuminsa cu gradici nos Pueblo di curason, cu tur 25 di januari ta celebra nos Libertador su bida recordand’e profundamente.
Mi ta gradici Minister Xiomara Maduro, un Minister dedica na mantene e cultura di nos Pais bibo, algo cu pa Betico tambe tabata hopi importante. Mi admiracion y gratitud pa e Comision Celebracion Dianan Nacional, cu tur aña ta traha cu amor y dedicacion pa haci nos dianan nacional inolvidabel pa tur.”
E aña aki e comision a bin cu un actividad nobo cu ta hopi educativo. Na tur docente cu a compila y traha e documentario di nos Libertador, e documentario a mustra nos imagennan cu nunca antes nos a wak. Na e grupo di docentenan cu a traha e contenido pa e “Kibra Coco” quiz, cu esaki ta e prome di hopi mas pa bini.
Ta importante pa nos mantene e memoria di nos Libertador bibo. Mas importante aun ta pa conta e historia corecto. Como yiu di Betico y Minister di Gobierno di Aruba, nos nunca a desea pa elimina ningun parti di e historia di nos Pais. Nos historia a forma nos como pueblo y como Pais. P’esey hamas nos mester acepta y mester keda lucha pa e historia corecto y completo di nos Libertador Betico Croes keda transmiti pa nos muchanan.
Cu su recuerdo y su historia sigui inspira tur nos muchanan, hobennan y nos Pueblo henter pa nos conserva y defende e ARUBA liber, cu su Status Aparte, como Pais den Reino Hulandes. Awor mas cu nunca nos mester lucha hunto pa Aruba su recuperacion Economico y Social pa sigura asina un prosperidad husto pa un y TUR cu ta biba riba nos Baranca Stima: Aruba.
Glenbert F. Croes
