Minister di Telecomunicacion, drs. Rene Herdé tawata tin e honor di ta presente pa celebra 40 aniversario di SETAR. E celebracion aki ta marca 4 decada di servicio, inovacion y compromiso pa conecta comunidad di Aruba.
Durante su speech pa conmemora e logro aki, Minister Herdé a elogia e papel fundamental di SETAR den e transformacion di e panorama di comunicacion di nos isla, di e prome dianan di telefon fiho te na e era actual di conectividad digital y servicio di telecomunicacion avanza.
Minister Herdé a bay bek den bahul di recuerdo y corda con tempo e tawata studia na Hulanda e unico manera pa comunica cu bo famia tawata via telegram di “Landsradio” of yamada telefonico di “Telefoondienst.” Awendia nos tur tin acceso digital via nos celular.
Minister a menciona con e compania SETAR a crece y transforma den locual e ta awo y kico SETAR ta nifica pa pais Aruba. SETAR semper a duna bek na comunidad di Aruba. Minister Herdé a bisa: “Ken por imagina carnaval por ehempel, sin wak e nomber di SETAR?”
Mundo henter ta depende riba tecnologia. Tecnologia ta crucial pa Enseñansa, Salubridad, Justicia y cualkier area di bida cu bo por imagina. Economia ta depende riba Telecomunicacion.
Minister Herdé a yama danki na Director di SETAR ing. Roland Croes, miembronan di directiva, board y personal pa nan dedicacion cu a contribui na e desaroyo di SETAR.
Pa finalisa Minister Herdé a desea SETAR pabien den nomber di gobierno y pueblo di Aruba cu e bunita logro.
