Diabierna mainta Minister Herdé a forma parti di un presentacion di Arsobispo Charles Jason Gordon cu a comparti reflexion moral di Iglesia Catolico tocante Inteligencia Artificial (AI).
Durante di e presentacion Arsobispo a papia tocante e importancia pa salvaguardia ser humano den tempo di Inteligencia Artificial y pa preserva e dignidad humano y e bon comun. Alabes Arsobispo a menciona “The least, little, lost, and last” un concepto poderoso teologico y cultural saca di Testament Nobo, cu ta referi na e individuonan den sociedad marginalisa, lubida y oprimi. E ta resumi na e yamada biblico pa stima y sirbi esunnan di menos recurso den comunidad.
Arsobispo a menciona cu pa proteha nos democracia contra e influencia di algoritmonan, ta indispensabel pa implementa medidanan estricto di transparencia pa sistemanan di Inteligencia Artificial, regula e uzo di microfocalisacion politico y limita e poder di monopolio tecnologico, pa garantisa cu ciudadanonan mes tin control riba e contenido disponibel online.
Un presentacion hopi interesante cu ta pone bo para keto un rato di cuanto influencia Inteligencia Artificial tin riba humanidad y con importante e ta pa nos tur como individuo percura pa no perde nos identidad, esencia y moralidad den e mundo moderno di Inteligencia Artificial.
