Como continuacion di e iniciativa pa busca solucionnan na e situacion relaciona cu uzo di vehiculonan ATV y UTV na Aruba, Minister di Infrastructura, drs. Rene Herdé, a bolbe reuni cu representantenan di touroperators.
E encuentro tabata enfoca riba dialogo y intercambio di opinion, pa sondea posibilidadnan pa logra un co-existencia entre e actividadnan turistico y recreativo cu ATV y UTV y e necesidad pa proteha nos isla su naturalesa y medio ambiente.
Durante e reunion, e importancia di mantene un dialogo habri entre Gobierno y sector turistico a forma parti central di e combersacion. E intencion ta pa sigui explora posibilidadnan cu por contribui na un balansa entre actividad economico, experiencia turistico y conservacion di nos medio ambiente.
Minister Herdé a enfatisa riba e importancia pa involucra e sector den e proceso di dialogo, pa por considera diferente perspectivanan y sigui busca un entendimento mutuo.
Gobierno ta pone enfoke riba dialogo y cooperacion cu e partidonan envolvi, cu e meta pa sigui traha na un posibel solucion cu ta tuma na cuenta e actividadnan turistico, conhuntamente cu e responsabilidad comparti pa proteha Aruba su naturalesa.
