Minister Xiomara Maduro di Cultura, a bishita e atelier di e artista Arubiano Gilbert Senchi na Bogota, Colombia pa asina cera conoci di cerca cu e obra di arte ‘Driekiel’ cu ta e obra di arte publico cu ta destina pa bay keda exponi riba un retonde na Aruba.

Obra di arte publico ta conscientisa, motiva y inspira nos riba temanan cu ta importante pa nos Pais. E obra ‘Driekel’ ta conscientisa nos riba e esfuerso cu nos mester haci pa proteha turtuga cu ta den peliger di extension. Aruba ta internacionalmente reconoci como un isla na unda cu e driekiel ta traha su neishi, biahando miles di miya for di tur skina di mundo y ta haciendo esaki pa mas di un milenio caba. E driekel ta nos prome ‘repeated guest’ di Aruba cu ta confia nos Isla pa traha su neishi y pone su webonan. Ta un proceso bunita den nos naturalesa cu ta recorda nos con bendiciona Aruba ta.

Obra di arte publico no ta sirbi solamente pa crea conscientisacion, pero ta fungi tambe como motivacion y inspiracion. Minister Maduro ta spera cu e obra publico aki por sigui motiva local y turista pa cuida e naturalesa di nos Pais. “Laga esaki inspira nos y inspira nos yiunan pa semper nos keda den balansa hunto cu nos naturalesa,” tabata palabra di e mandatario na ocasion di bishita na e artista Arubiano Gilbert Senchi kende ta encarga cu e obra di arte publico aki.

Minister Maduro a splica cu e obra di arte publico ‘Driekiel’ lo wordo exponi riba un rotonde, pero ainda no tin un decision final riba cual rotonde esaki lo wordo poni. E mandatario a divulga cu e deseo ta pa Su Alteza Real  Princesa Amalia por haci e desvelo di e obra aki durante e bishita Real cu lo tuma luga otro aña na final di januari 2023. 

Minister Maduro ta honra di por a haya e oportunidad pa mira e obra ‘Driekiel’ den su fase final y ta spera cu pronto e obra di arte aki lo ta na Aruba pa asina local y turista por aprecia esaki.

LEAVE A REPLY

Please enter your comment!
Please enter your name here