Hunto cu e organisacion Americano Internet Archive, e partnernan cu ta forma parti di Coleccion Aruba, a bin ta digitalisa y haci accesibel via internet mas di 150 mil diferente buki, revista, corant, potret, video etc cu ta contene informacion di Aruba y Papiamento. Di e manera aki na Aruba trabounan pionero den nos region ta wordo haci pa conserva nos herencia cultural y haci esaki accesibel online via www.coleccion.aw. Pa e trabou importante aki, Aruba a wordo premia recientemente cu e Internet Archive Hero Award.
E informacion cu ta wordo digitalisa na Aruba pa e partnersnan di Coleccion Aruba, ta wordo haci accesibel riba internet via e servernan di Internet Archive na Merca cu ta haci esaki gratuitamente posibel. Pa Internet Archive ta importante pa material historico cu ta forma parti di e memoria di un Pais ta accesibel, no solamente pa e habitantenan di e Pais, sino tambe pa mundo henter. Cu e intencion aki, nan ta sostene Aruba pa Coleccion Aruba por ta accesibel riba un server special cu nan a yama Internet Archive Aruba.
Pronto e server aki lo wordo treci Aruba pa asina material digital di nos herencia cultural por wordo warda na Aruba mes, y na mes momento tin un back-up na diferente datacenter di Internet Archive rond di mundo.
E intencion ta pa e server na Aruba un dia fungi tambe como server pa otro paisnan den nos region por tin un backup di nan material historico den e server di Internet Archive di Aruba. Den e tempo nos dilanti nos lo tende mas si por concretisa e idea aki.
E server di Internet Archive Aruba lo wordo instala na Biblioteca Nacional di Aruba na unda elo ta visibel pa publico por mira unda nos herencia cultural ta wordo convserva y haci accesibel pa henter mundo.
