Siman pasa Minister Maduro di Cultura tabata na Corsou pa asina representa Conseho di Minister di Aruba na e celebracion di e 40 aniversario di Dia di Bandera di Corsou. E mandatario a haci uzo di e momento festivo pa asina por a pasa bishita algun museo na Corsou. Entre nan, Minister Maduro a pasa bishita e monumento historico Sinagogo Mikvé Israel-Emanuel miho conoci como SNOA y e Museo di Hudiu na Corsou. Motibo di e bishita tabata pa e mandatario di Cultura por haya sa mas di e cultura Hudiu y tambe di e descendencia Spaño y Portugues di un grupo grandi di cuidadanonan na Corsou y Aruba. E SNOA y e Museo ta conta nos un parti special di e historia di hopi famia cu awe ainda ta forma parti di e comunidad na Corsou y Aruba.
SNOA
Minister Maduro a wordo ricibi y guia cariñosamente pa sra. Michèle Russel-Capriles hunto cu otro miembro di e directiva sr. Sinuhe Oomen y Rabbi Martin Hirsh, kendenan a duna e mandatario un splicacion den e tempel. E SNOA na Corsou a wordo consegra na aña 1732 y ta e sinagogo mas bieu den uzo continuo na e continente Americano. E monumento historico aki ta forma parti esencial di e historia di e Hudiunan cu a scapa fo’i Spaña y Portugal den e añanan 1500 y cu via Hulanda a bin establece nan mes na Corsou y den e region. E edificio ta den arkitectura Hulandes y ta conta cu meubles di mahony, bunita candelaria y adorno di koper y plata, y un piso di santo cu ta haci e tempel uno masha special, ya cu masha poco sinagogo na mundo tin un piso di santo.
Museo di Hudiu
Despues di e bishita na e SNOA, Minister Maduro a haya un recorido den e Museo di Historia y Cultura Hudiu na unda sra. Michèle Russel-Capriles kende ta Presidente di e museo, a splica mas di e historia di e Hudiunan cu a bin via Hulanda na Corsou y Aruba. Den e patio di e museo a haya informacion di e cementerio Hudiu Bet Haim cu ta esun mas antiguo di Caribe y di e Hemisfera Oeste. E mandatario por a admira e lapidanan riba cual tin obra di arte cu ta conta e storia di ken e defunto tabata na bida, di cual famia e ta bin y kico tabata su profecion of di kico ela fayece. Den e museo por aprecia e artefactonan di diferente ritual di e religion Hudiu y por haya un bista di e bida cotidiano di e comunidad Hudiu na Corsou. Como cu ta un museo bibo, cada bes por haya sa mas di e bida y e logronan di diferente Hudiunan prominente di Corsou. Den e museo ta resalta un obra di sra. Michèle Russel-Capriles cu ta conta e storia di e Hudiunan Sefardita cu mester a scapa di e Peninsula Iberico debi na e Inquision Spaño cu tabata obliga nan conberti den Catolico. E obra ta inspira pa su querida Mama cu tabata tin e custumber Hudiu di warda e yabinan di tur e casnan cu nan a biba aden. Esaki basa riba e leyenda cu ora a scapa di Spaña, e Hudiunan a hiba e yabinan di nan cas y ainda ta conserva nan pa si un dia nan bolbe bek.
Acceso na historia comparti
Minister Maduro ta gradici sra. Michèle Russel-Capriles y henter e ekipo di e SNOA y Museo Hudiu pa e bishita informativo aki. E mandatario na final di su bishita a expresa su deseo pa informacion riba e herencia cultural Hudiu na Corsou tambe por forma parti un dia di e plataforma digital pa conserva nos herencia cultural, Coleccion Aruba, pa asina e descendientenan Hudiu na Aruba tambe por tin acceso na forma digital na e historia comparti aki.
