ARUBA A HAYA UN OTRO EVALUACION POSITIVO DI IMF SU ARTICLE IV MISSION
Nos Pais ta recupera fuertemente despues di e pandemia
Aruba ta habri siman cu noticia positivo. IMF a publica e resultado di nan evaluacion financiero y economico di Aruba den e “Staff Concluding Statement of the 2023 Article IV Mission,” y esaki un biaha mas ta positivo pa Aruba. E ultimo dos simannan e team di IMF tabata na Aruba pa asina evalua e sistema financiero y economico di Aruba. E team a reuni cu varios persona y instancia na Aruba pa asina por haya un bista di e situacion na nos pais, y awo a publica e resultado di nan evaluacion. IMF ta raporta pa Aruba un “A strong bounce back from the pandemic”. Nos Pais a recupera fuertemente di e pandemia danki na e crecemento economico induci pa un turismo fuerte y gastonan di gobernacion cu a keda reduci a medida cu e pandemia a pasa. Aki ta sigui algun resultado importante di e evaluacion.
Crecemento fuerte door di turismo
IMF ta raporta cu na aña 2021 Aruba a conoce un crecemento real di 27.6% di GDP y esaki a sigui den 2022 cu 7.3% di GDP. Esaki ta refleha e recuperacion fuerte di turismo.
Inflacion tabata modera
E evaluacion ta mustra cu e indice di inflacion tabata modera y esaki a baha bay na 4.9% den April 2023 basa riba prijsnan di importacion di energia, comestibel y subida di prijs di coriente y awa na Augustus 2022.
Menos desempleo
Desempleo na Aruba tambe a baha na 6.6% na Juni 2022 y ta premira pa sigui baha den e lunanan nos dilanti.
Deficit y debe a baha
IMF ta raporta cu deficit fiscal y e debe di Aruba a baha. E deficit a ser reduci na -0.5% na aña 2022 compara cu -16.2% di GDP na aña 2020. Esaki ta refleho di entradanan mas halto debi na recuperacion economico y adaptacion di gastonan debi na e pandemia. E debe di Gobierno a wordo reduci di 112.3% di GDP na aña 2020 pa 90.7% di GDP na aña 2022.
Recuperacion credibilidad financiero
Atencion a wordo poni tambe pa e recuperacion di Aruba su credibilidad financiero cu a keda nota pa un upgrade di Aruba su ratings cerca Fitch.
Den e rapport di IMF por lesa mas di e resultado di e evaluacion positivo aki pa Aruba. E rapport tin varios recomendacion tambe cu Aruba mester sigui traha riba nan. Entre otro, e debe halto di nos Pais cu mester wordo maneha, e gastonan cu mester wordo manteni na un nivel responsabel y e atencion cu mester wordo duna na e retonan cu un poblacion cu ta bira ‘mas grandi den edad’ ta trece cune.
Minister di Finansa Xiomara Maduro ta satisfecho cu e rapport di IMF, y ta gradici y reconoce e trabou grandi haci pa Aruba su profesionalnan. Masha danki pa boso esfuerso grandi na bienestar di Aruba. E mandatario ta gradici tambe e team di Article IV Mission lidera pa sr. Takuji Komatzusaki di IMF pa e trabou diligente haci pa Aruba.
