Un apelacion pa comunidad pa sostene y biba nos cultura
Durante tratamento di Presupuesto 2022, Cultura tambe a haya su debido atencion di Parlamento. Diferente Parlamentario a haci pregunta y Minister Maduro a brinda contesta. Tabata tin pregunta riba e trabounan cu ta wordo haci pa por lanta un industra creativo na Aruba, e cambionan cu por spera na Departamento di Cultura, aporte fo’i Fondo di TPEF pa cultura, e resultado di e Vierlandenoverleg entre Ministernan di Cultura di Reino Hulandes teni recientemente na Hulanda, educacion cultural na scol, weganan di antes den bario, competencia di Dande na scolnan, atencion pa nos cultura cerca esnan cu no tin hopi tempo biba na Aruba y renobacion di Cas di Cultura.
Riba cada pregunta Minister Maduro a brinda splicacion amplio y ta aprecia cu Parlamentarionan a dedica tempo pa formula hopi pregunta cu ta resalta e importancia di e trabounan riba e tereno di Cultura pa nos Pais. Na final di su disertacion, e Minister Maduro a haci un apelacion na Pueblo y specialmente na e Parlamentarionan pa biba nos cultura door di bishita y sostene e actividadnan cultural na nos Pais. Nos artistanan merece tur sosten cu por wordo duna, door di bishita nan show of cumpra nan obra di arte. Cultura ta importante, pesey nos tur hunto ban dedica mas na conserva, apoya y biba nos cultura.
