Diaranson mainta, sra. drs. Mervin Wyatt-Ras, Minister di Salubridad, Asunto Social, Cuido di Adulto Mayor y Maneho di Adiccion, hunto cu e Minister di Finansa, Asunto Economico y Sector Primario, mr. Geoffrey Wever, a anuncia oficialmente e di dos edicion di ‘Fiesta di Cunucu pa Nos Grandinan’. E celebracion aki ta duna continuidad na e cooperacion entre Directie Ouderenzaken (DOZ) y Departamento di Agricultura, Cria y Pesca (Santa Rosa), y lo tuma luga diadomingo 28 di juni proximo na Santa Rosa.
Minister Wyatt-Ras ta contento di mira cu e colaboracion aki ta sigui duna fruta. Como Minister encarga cu Cuido di Adulto Mayor y Asunto Social, e meta principal ta keda enfoca riba crea mas oportunidad pa nos adultonan mayor mantene nan mes activo, conecta cu comunidad y participa den actividadnan cu ta contribui na nan bienestar social. E prome edicion, realisa na october di aƱa pasa, tabatin un acohida sumamente positivo cerca nos grandinan y den comunidad, locual a sirbi como e motivacion principal pa sigui construi riba e fundeshi aki.
“Nos enfoke ta pa combati isolamento y percura cu nos grandinan sinti nan mes balora y ta biba cu dignidad. Pa hopi persona, e contacto directo cu naturalesa por contribui positivamente na bienestar fisico y mental, trece trankilidad y sirbi como un pilar fundamental pa un bon desaroyo social,” Minister Wyatt-Ras a declara.
Ademas, e Minister a enfatisa cu e actividad aki ta crea un espacio ideal unda diferente generacionnan por reuni. “Door di fomenta e intercambio aki, nos ta crea oportunidad pa nos grandinan comparti nan conocemento, custumbernan y tradicionnan relaciona cu agricultura cu generacionnan mas hoben, contribuyendo asina pa e legado y e cultura di cunucu keda bibo den nos comunidad,” e Minister a enfatisa.
E edicion special aki lo tuma luga dia 28 di juni proximo na Santa Rosa y lo ofrece un dia agradabel, yena cu ambiente, cuminda crioyo y productonan local fresco. Debi cu e fecha ta cay rond di e celebracion tradicional di San Juan, esaki lo agrega un toke cultural unico na e actividad, engrandeciendo e ambiente alegre y familiar.
Minister Wyatt-Ras a conclui expresando su palabranan di gradicimento na Santa Rosa, na e ekipo di Directie Ouderenzaken y na tur colaborado cu a traha incansablemente pa haci e iniciativa aki posibel, reiterando e compromiso di sigui traha pa un comunidad caminda nos grandinan por biba un bida activo, digno y trankilo.
