Minister-president mr. Mike Eman a asisti awe mainta na un encuentro social yen di cariño na Seroe Janchi, caminda e y su señora Doina a pasa un bon mainta hunto cu un grupo di pensionado. E actividad aki a tabata organisa pa famia Arends–Kelly, cu tabata kier sorprende e Premier Eman y su señora cu un acto di agradecimiento den nomber di e adultonan mayor di e bario.
Durante e reunion, e pensionadonan no solamente a disfruta di un dushi desayuno, pero tambe di un dialogo sincero y yena di gratitud. E adultonan mayor a expresa nan aprecio pa e desicion di gobierno AVP-Futuro y pa e esfuerso personal di Premier Eman, pa e aumento di AOV cu 250 florin y e restauracion di cobertura di AZV p’e remedinan cu tabata elimina antes.
Premier Eman a enfatisa cu e pasonan aki ta producto di un esfuerso conhunto di su gobierno, y a pidi un aplauso pa e ministernan Mervin Wyatt Ras, Gerlien Croes, Geoffrey Wever, Wendrick Cicilia y Arthur Dowers. E tambe a mustra cu e fraccionnan di AVP y Futuro ta un pilar importante den e logronan aki.
“Un sociedad no por bira mas fuerte si nos laga atras esnan mas fragil. Nos adulto mayor merece siguridad, respet y dignidad,” segun Premier Eman.
Durante e mesun ocasion, Minister-president Eman a anuncia cu Gabinete AVP-Futuro actualmente ta haciendo un estudio pa baha of elimina completamente e 5% prima di AZV cu e pensionadonan ta paga, pa esnan cu un ingreso anual bou di 30.000 florin.
“Nos ta buscando un solucion husto. Si bo a traha tur bo bida y bo ta ricibi un pensioen chikito, bo por spera cu gobierno no ta pone mas carga riba bo,” Premier Eman a enfatisa.
“Nos tey pa nos pueblo. Especialmente pa esnan cu tin mas necesidad. Dignidad di nos grandinan no ta un punto final den e presupuesto, sino un guia moral pa nos maneho.”
E encuentro a culmina cu un gran aplauso pa Premier Eman y un promesa di e presente-nan: e adultonan mayor di Seroe Janchi lo sigui traha pa nan comunidad y ta firme den nan sosten pa un gobierno cu ta mehora visibelmente nan calidad di bida.
