Durante e celebracion di Dia Nacional di Aruba, Prome Minister Mike Eman a tene awe un discurso special den presencia di Su Mahestad Willem-Alexander, den cual el a pone enfasis riba e profundo conexion historico entre Aruba y e Casa Real.
Den su discurso, e Prome Minister a destaca cu 18 di maart no solamente ta un dia di celebracion nacional, cu 40 aña di Status Aparte y 50 aña di nos himno nacional, sino tambe un dia unda diferente liñanan historico ta bin hunto.
El a hiba e publico bek na aña 1948, ora un delegado di Aruba, respalda pa un peticion firma pa 2147 Arubiano, a busca reconocemento pa un status propio dentro di Reino. For di documentonan di Archivo Nacional na Hulanda, ta resulta cu e Gabinete di Reina Wilhelmina a pidi conseho na Minister van Overzeese Gebiedsdelen: si e delegado di Aruba mester wordo ricibi.
“E respuesta a sigui riba 29 di januari. E isla ta chikito. E poblacion ta chikito. E parlamento ta chikito. Y precisamente p’esey, segun e conseho, un audiencia por duna demasiado peso na e deseo aki.”
Contra e conseho pa no ricibi e delegado, Reina Wilhelmina a decide di ricibi’e personalmente na Palacio Noordeinde.
“E conseho tabata cla: no ricibi. Trata e peticion por escrito. Pero despues, riba 19 di februari 1948, riba un dia friu di winter na Hulanda, e portanan di Palacio Noordeinde a habri.”
Prome Minister Eman a bisa:
“Pafo ta friu, pero paden e recibimento ta caluroso. Reina Wilhelmina a scoge pa haci algo diferente. E no kier solamente lesa. E kier encontra. E kier mira e cara di e delegado y asina tambe e cara di Aruba.”
“E mesun dia, e periodiconan a reporta cu Reina a ricibi e delegado di Aruba y a ricibi e documentonan personalmente. Claramente, Reina Wilhelmina si kier a mira e cara di e delegado, y asina e cara di e pueblo Arubiano.”
Den palabra inspira pa filosofo Emmanuel Levinas, e Prome Minister a expresa:
“Presencia anonimo ta wordo elimina; nos bida ta sirbi e cara, e mirada di otro.”
Segun e Prome Minister, e decision aki, pa no solamente lesa, sino pa encontra y mira, a marca un punto decisivo den historia di Aruba.
“E unico decision aki a haci diferencia. A duna un cara na un pueblo cu kier a ser mira.”
El a conecta e momento historico aki directamente cu presente. Riba 18 di maart 1948, durante e Conferencia di Mesa Redondo cu a sigui despues di e encuentro, pa prome biaha a reconoci Aruba su aspiracion pa un status separa.
Den un forma literario, e Prome Minister a tene e identidad di e delegado scondi pa un rato, papia di “e cara di Aruba” cu a wordo ricibi, sin revela su nomber. Asina el a crea tension y invita e publico pa conecta cu e historia mas grandi di un pueblo cu kier a wordo mira.
Solamente ora el a bolbe na e fecha simbolico di 18 di maart, e desenlace a bin. El a referi na 18 di maart 1996, ora e tempo ey Prins Willem-Alexander tabata presente na Aruba pa desvelo di un monumento cu e nombernan di e 2147 firmantenan. Na e monumento ey, tabatin tambe un busto.
Na e momento ey, e Prome Minister a revela, literalmente y figurativamente, e identidad di e delegado Arubiano.
Prome Minister Eman:
“Eynan tin un busto tambe. Di e homber cu a representa nan banda Reina Wilhelmina: Cornelis Albert Eman, mi tata. E no ta aki mas. Hopi di nan no ta aki mas. Pero nan no a keda sin nomber. Ni sin cara. Tambe danki na e unico decision aki den 1948: pa encontra. Pa mira.”
Segun e Prome Minister, no ta casualidad cu presencia di e Rey awe ta coincidi atrobe cu e fecha aki.
“E liñanan den historia y esnan di e Rey ta crusa riba un punto special pa Aruba,18 di maart.”
Den su discurso, el a enfatisa tambe e rol continuo di e Casa Real como un forsa di conexion dentro di Reino. Den un contexto unda relacionnan constitucional tin biaha ta bou presion, ta describe e Casa Real como un simbolo di continuidad, encuentro y reconocemento mutuo.
E mensahe central di e discurso tabata cla y poderoso:
Aruba semper tabatin e deseo pa wordo mira y e forsa di Reino ta basa riba sigui mira otro.
Segun e Prome Minister, presencia di Su Mahestad durante e celebracion a duna un dimension adicional na e mensahe aki.
“E Reino no ta consisti solamente di structura,” Eman a conclui, “pero di hende. Di encuentro. Di reconocemento.”
