Minister di Vivienda, Infrastructura y Telecomunicacion, drs. Rene Herdé tawata tin e honor di ta presente diabierna 17 di december na Fort Zoutman durante un momento historico pa Aruba.
Durante e atardi, categorisa como un regalo di pasco, 17 doño a firma e erfpachtakte pa bira oficialmente propietario di nan cas. Esaki a tuma luga den un esfera ameno cu presencia di famia, representantenan di DLV, DIP, FCCA, notario Yarzagaray y su team.
Durante su presentacion Minister Herdé a menciona cu e ta imagina con e 17 famianan a anhela pa haya un cas y a traha duro pa por paga p’e y awo porfin por bisa cu no solamente a haya un cas pa biba aden, pero cu hopi orguyo por bisa esaki ta MI cas.
Minister a recorda tempo el a haya oportunidad pa bay studia den exterior y tawata manda carta pa su mayornan y con su mama tawata puntra: “Mi yiu, ki dia bo ta bin cas.” E hecho cu bo por bay un luga caminda bo famia y sernan keri ta y bisa mi ta bay cas ta dushi. Mas importante ta ora bo sa cu e cas ey ta di bo y cu e ta keda di bo, no djis como propiedad, pero e ta e fruto di bo sodo, bo pasenshi, bo persistencia y cu abo por dicidi despues si bo ta pas’e pa bo famia y yiunan. Un logro asina ta haci bo rico como hende y famia.
Minister a bay bek den historia y recore pasado durante e prome gobernacion di Aruba despues di Status Aparte ex-mandatarionan manera Henny Eman, Watty Vos, Mito Croes y Manchi Engelbrecht (d.f.m.) a papia tocante e logro aki. Con por percura pa hendenan manera esnan presente, cu pa añanan largo a traha y paga tur luna, pa asina nan por bira doño di nan cas. Esaki tawata algo desconoci pa nos isla, pero e tawata cuadra den e pensamento y vision di e prome gobierno di Aruba. Un di e metanan di e tempo ey tawata pa construi un pais pa tur hende y percura pa nos hendenan tin nan propio cas y asina e idea a nace pa bosonan bira doño di boso propio cas.
Minister Herdé a termina bisando cu danki na e persistencia di e tempo ey y persistencia actual di Prome Minister Mike Eman, awe por cuminsa cu e prome 17 famianan di e grupo grandi cu tin hopi tempo ta warda y porfin por bisa cu nos a logra pa e simia cu a wordo planta e tempo ey, awe a florece y por corona esaki cu boso firma. Pabien di curason!
