Minister Rianne Letschert (Enseñansa, Cultura y Ciencia) lo bishita Sint Maarten, Corsou y Aruba di 16 te cu 20 di november 2026. E bishita ta concentra riba e reunion ministerial di cuater pais den Reino Hulandes tocante Enseñansa, Cultura y Ciencia (M4LO), y tambe ta sirbi como un oportunidad pa e minister familiarisa su mes cu e paisnan Caribeño den Reino Hulandes.
Minister Letschert lo wordo ricibi diamars mainta, 17 di november, door di Gobernador di Sint Maarten, Ajamu Baly. Durante mainta, e minister lo bishita e instituto di enseñansa profesional NIPA, caminda e lo tene combersacion cu docente, entre otro tocante capacidad di resistencia y preparacion pa enfrenta desafionan.
Den atardi lo cuminsa e reunion M4LO, cu e aña aki ta bou di presidencia di Sint Maarten. Cada aña, e ministernan responsabel pa enseñansa, cultura y ciencia di Aruba, Corsou, Sint Maarten y Hulanda ta reuni den e marco di M4LO.
Pa prome biaha, e aña aki tambe lo participa diputadonan y representantenan di Caribe Hulandes, esta Boneiro, Sint Eustatius y Saba. Hulanda ta asumi presidencia di e reunion cada dos aña. Den e añanan intermedio, presidencia ta rota entre e paisnan Caribeño den Reino Hulandes.
Participantenan di e reunion ministerial
E participantenan di e reunion di cuater pais ta inclui Premier Mike Eman di Aruba, kende tambe ta Minister di Cultura, Medio Ambiente y Naturalesa; Minister Melissa Gumbs di Sint Maarten, responsabel pa Enseñansa, Cultura, Hubentud y Deporte; Minister Gerlien Croes di Aruba, responsabel pa Enseñansa, Ciencia y Desaroyo Sostenibel; y Minister Sithree van Heydoorn di Corsou, responsabel pa Enseñansa, Ciencia, Cultura y Deporte.
Durante e reunion M4LO di e aña aki, lo discuti diferente topico importante, entre otro e importancia di cooperacion entre sector di enseñansa y mercado laboral, conoci como Braingain, multilinguismo den enseñansa, uzo di telefon den klas y e procedimento conhunto pa nominacion na lista di Patrimonio Cultural Inmaterial di UNESCO na nomber di henter Reino Hulandes.
Mescos cu aña pasa, e programa Strategic Education Alliance (SEA) ta forma parti di e agenda. Esaki ta un programa importante den henter Reino Hulandes, cu tin como meta aumenta e exito academico di studiantenan Caribeño.
Tambe lo discuti e informe di Onderwijsraad titula ‘Onderwijs in Caribisch Nederland’, cu ta trata enseñansa den Caribe Hulandes.
Bishita na Corsou
Diahuebs mainta, 19 di november, Minister Letschert lo biaha pa Corsou. Despues di ser ricibi door di Gobernador Mauritsz J. de Kort, e minister lo bishita Parasasa Hotel, un hotel di practica pa studiantenan cu ta sigui formacion den sector di hospitalidad.
Den atardi, e minister lo bishita Universidad di Corsou, caminda e mesun dia lo tuma luga e prome edicion di Kennisfestival ‘Fit for the Future’.
Durante e festival aki, Minister Letschert lo participa den combersacionnan tocante investigacion y ciencia den region Caribeño.
E dia lo termina cu un encuentro di familiarisacion cu Herdenkingscomité Slavernijverleden, e comision di conmemoracion di pasado di sclavitud, y un bishita na Otrobanda, cu ta forma parti di Patrimonio Mundial di UNESCO.
Minister Letschert lo termina su bishita na Aruba
Diabierna 20 di november, Minister Letschert lo conclui su bishita na Aruba. Aki tambe e minister lo wordo ricibi door di Gobernador Alfonso Boekhoudt.
Na Aruba, Minister Letschert lo bishita scol basico ‘Scol Primario Kudawecha’ den marco di e programa Kibrahacha. E programa aki ta concentra riba formacion conhunto di maestronan pa enseñansa primario na Aruba, Boneiro y Corsou.
Despues lo sigui un bishita na e instituto di enseñansa profesional EPB y Universidad di Aruba.
E dia, y cu ne e bishita oficial na e tres paisnan Caribeño, lo termina cu un bishita na Archivo Nacional Aruba.





