Diaranson mainta, Minister di Husticia y Asuntonan Social Sr. Rocco Tjon a bishita Stichting Ambiente Feliz (SAF), caminda a papia cu e trahadonan como tambe e hunta di maneho y a logra yega na cierto palabracionnan. E dia a inicia cu un bishita na Cas Curason, cual ta e localidad di SAF na St. Cruz, sigui pa Cas Briyante, situa na San Nicolas. 

Durante e bishita aki a logra haya informacion di e trahadonan, kende a duna un splicacion amplio riba kico tur e trabou ta ensera, y con nan ta percura pa brinda un bon cuido na nan clientenan. Cada localidad ta destina pa dos diferente tipo di cliente; Cas Curason ta specificamente pa personanan adulto cu un limitacion mental, y Cas Briyante ta brinda cuido specialisa pa personanan cu multiple limitacion cu ta rekeri cuido intensivo. A reuni tambe cu e hunta di maneho, despues di a ricibi nan plan multianual pa loke ta 2022-2026. Banda di esaki, a ricibi tambe un relato anual di 2021, den cual a wordo delinea kico tur e fundacion a logra caba y kico tur nan lo kier logra.

Durante e reunion aki a logra haci palabracionnan concreto, caminda e hunta di maneho lo bay percura pa evalua con ta acopla e plan multianual na e presupuesto, pa asina a largo plaso por percura cu e cuido aki ta wordo salvaguardia. Banda di esaki, a haci palabracionnan a corto plaso, caminda a base di proyectonan lo bay indica unda mas, banda di e presupuesto regular, mester di algun ayudo adicional for di Ministerio di Husticia y Asuntonan Social. Na final di dia, e ayudo aki tin un impacto grandi riba e cuido cu ta wordo brinda na tur e clientenan cu ta haci uso di servicionan cu SAF ta brinda. 

Por ultimo, Minister Tjon a expresa di a keda sumamente impresiona di por a experencia kico tur nan ta brinda, y e meta ta pa sigui mehora esaki. Banda di esey, a base di e bishita cu a haci dialuna anterior na SVGA, a keda contento di por wak con e dos fundacionnan aki ta colabora cu otro, caminda nan ta haci miho uso di e recursonan cu nan tin y asina brinda un miho cuido na e tipo di clientenan cu nan tur dos ta sirbi.

LEAVE A REPLY

Please enter your comment!
Please enter your name here