Dialuna mainta, Minister di Husticia y Asuntonan Social Sr. Rocco Tjon, a ricibi un recorido como tambe un presentacion amplio di Directie Voogdijraad. Durante e mainta aki, a logra haya sa mas kico ta e trabou cu nan ta haci como tambe nan preocupacionnan. Un presentacion hopi interesante y informativo, di cual sigur lo analisa e diferente necesidadnan pa asina brinda e ayudo necesario na un manera mas eficiente.

Minister Tjon a ricibi un recorido amplio di parti di e Directrice di Directie Voogdijraad, Sra. Aisca Berkemeyer, pero hopi importante tambe, a logra combersa cu e personal mes cu ta ehecuta e trabou. Akinan por papia di trahadonan social, raadsonderzoekers, huristanan y psicologonan. Tawata hopi interesante pa scucha for di nan mes, kico ta nan retonan y locual a resalta mesora ta e pasion cu nan tin pa e trabou aki y pa e motibo ey tambe e ta importante pa e aña nan nos dilanti nos bay inverti mas den e departamento aki.

Segun e Mandatario, algun di e puntonan cu a bin padilanti ta aspectonan pa loke ta trata nan posicion huridico cu lo mester wordo regla mas miho, cual ta mara na un reorganisacion cu lo mester tuma lugar. Otro punto clave ta e falta di personal, cual ta keda un di e retonan di mas grandi y di cual lo mester wak con ta bay logra surpasa e reto aki na un manera responsabel mirando e situacion financiero di pais Aruba. Esakinan ta puntonan importante cu lo percura pa nan por brinda un miho servicio na nan clientenan pero tambe na tur e socionan den e cadena aki. Un otro punto cu ta bin hopi padilanti, ta e hecho cu mester bin un miho sincronisacion di procesonan y trabounan entre tur e departamentonan como tambe instancianan. Algo hopi importante tambe pa trece pa dilanti ta e hecho cu Voogdijraad ta e “last resort”, pues den otro palabra te na ultimo momento e clientenan lo mester acudi akinan. Pues e ta hopi importante pa inverti den e voortraject pa asina otro departamentonan cu kisas tin mas personal y recurso procesonan mas miho delinea na otro pa asina tambe baha e presion cu tin riba Directie Voogdijraad.

Por ultimo, a base di presupuesto tin algun proyectonan concreto cu a wordo presenta di cual sigur tin e espacio financiero pa esey, manera un telefooncentrale pa asina por brinda un miho servicio na tur e clientenan. Na mes momento e aspectonan cu ta regarda e posicion huridico tambe tin espacio pa atende e aña aki mes como tambe e parti di opleidingen cual a wordo treci padilanti door di personal. Opleidingennan specifico pa e raadsonderzoekersnan cual tambe lo bay delibera pa wak con esaki por wordo incorpora den un “integrale opleidingsplan” pa asina yega compensa e personal tambe. Un aspecto hopi importante cu tambe lo mester haya su debido atencion, ta e parti di ayudo social pa e trahadonan mes, mirando nan propio salud mental.

LEAVE A REPLY

Please enter your comment!
Please enter your name here