Dialuna merdia, Minister di Husticia y Asuntonan Social Sr. Rocco Tjon a reuni cu Sr. Hans de Vries, kende ta e actual director di Nationaal Cyber Security Centrum (NCSC), na Ministerio di Husticia y Siguridad na Den Haag. E reunion a enfoca riba ultimo desaroyonan y puntonan di atencion pa loke ta trata siguridad cibernetico. Banda di esaki, a trata tambe e parti di cooperacion cu Aruba su departamentonan cu ta activo riba e tereno aki.
Actualmente NCSC ta lidera e tereno di siguridad digital, como tal por fungi como un centro di conocemento. NCSC ta encarga cu diferente tareanan, entre otro e conexion entre departamentonan gubernamental, nacional y internacional. Nan ta yuda den mitiga e impacto di atakenan cibernetico, door di monitorea menasanan constantemente, y ta duna consehonan. NCSC Tin expertonan cu ta disponibel 24/7 pa atende cu cualkier riesgo of crisis. Adicionalmente, nan ta consisti di tres unidad, esta e unidad di operacion, e unidad di cooperacion y compartimento di conocemento, como tambe unidad di provision di informacion y tecnologia.
NCSC ta traha cu diferente partnernan, entre nan ta e “Nationaal Coördinator Terrorismebestrijding en Veiligheid (NCTV)”. NCTV tin como meta pa proteha e pais contra menasanan cu por afecta e comunidad. Den cuadro di siguridad cibernetico, NCTV ta e “beleidsopdrachtgever” pa NCSC. Pa e motibo aki, presente tambe na e reunion aki tawata Director di NCTVI Aruba, Sr. Dolfi Richardson. Por utlimo, e Mandatario a indica cu esaki ta un paso concreto den cuadro di eleva siguridad na nos frontera, y ta wak bek na un reunion fructifero, cu beneficionan a largo plaso pa pais Aruba.
