Minister Plenipotenciario mr. Ady Thijsen a haci un bishita na burgemeester di Dordrecht Wouter Kolff. Tambe presente na e bishita aki ta John Dirks, studiementor pa Rotterdam.
Burgemeester Kolff a yama minister Thijsen bon bini na Dordrecht y a conta e mandatario un tiki di e historia di Dordrecht, como un di e ciudadnan mas bieuw di “Holland” cu loke awe ta e provincianan Noord-Holland y Zuid-Holland. Semper Dordrecht tabata conoci pa comercio y e mundo maritimo. Un fecha importante den historia di Dordrecht ta 1572 unda pa prome biaha a tuma lugar un reunion liber di Staten (Eerste Vrije Statenvergadering) contra di e Reinado Spaño y pro Willem van Oranje.
Sr. Kolff a bisa cu pa hopi tempo Dordrecht tabata e waf mas grandi di Hulanda, un posicion cu despues Rotterdam a tuma over. Keto bai e sector maritimo ta keda importante y grandi pa Dordrecht y otro ciudadnan rond manera Papendrecht y Zwijndrecht, banda di e industria di palo y metal. Tin companianan Hulandes grandi cu ta opera internacional, manera Oceanco y Boscalis for di Dordrecht y vecindario. Tambe na Papendrecht bo tin Fokker, cu te ainda ta suministra piesa pa avionnan Fokker. E sector di MKB tambe ta hopi importante pa economia di Dordrecht.
Minister Thijsen na su turno a papia di su vision pa busca manera di cooperacion cu municipionan (Gemeente), provincianan, institutonan y sector di enseñansa. Ela duna un resumen di tur e bishitanan y kico te ainda a sali afor di e bishitanan. Como ehempel concreto minister Thijsen a menciona e municipio di Venray cu Aruba ta den e fase pa hinca e forma di cooperacion cu Venray den un “Letter of Intent”. Tambe sr. Thijsen a menciona e palabracion cu e burgemeester di Groningen pa ricibi nos studiantenan. Cu Leiden ta interesante si hobennan Arubiano por haci uso di e projecto pa traha den e sector di cuido, unda Leiden ta paga nan estudio, vivienda y zorg pa nan haya un trabao. E experticio aki segun sr. Thijsen por beneficia e sector di cuido na Aruba.
Un punto cu a bin dilanti den e combersacion ta enseñansa, na unda burgemeester Kolff a bisa cu Dordrecht a caba di habri un Hogeschool nobo – Dordrecht Academy – cu ta brinda estudionan pa profesionnan di futuro, manera e sector maritimo, metal y salubridad. Asina ta purba na brinda e hobennan perspectiva y pa nan keda den Dordrecht despues di nan estudio.
Minister Thijsen a trece dilanti e problematico cu camber pa studiante y cu kisas Dordrecht por yuda, mirando cu e ciudad ta cerca di Rotterdam. Burgemeester Kolff a bisa na su turno cu Dordrecht pa hopi aña no a construi ningun vivienda, mientras cu e demanda ta grandi y e nos sa si Dordrecht por yuda den esaki.
Burgemeester Kolff a bisa cu pa e bishita aki ela invita Bart Reedijk, cu ta “re-integratieofficier” na Dordrecht. Ela cuminsa cu e funcion aki na 2019, despues cu ela traha na Den Haag como projectmanager “wonen en werken”. Den e funcion aki e tabata yuda hobennan cu a sali for di prison na haya un trabao. Su manera di traha tabata asina exitoso, cu na momento cu Dordrecht tabata busca un funcionario cu lo mester evita cu hobennan cu sali for di prison, bira recidivista, sr. Reedijk tabata e candidato perfecto pa e trabao aki. E enfoke ta riba criminalidad pisa, manera asalto y robo riba caya y tambe criminalidad violento, cu tin un impacto hopi grandi riba e victimanan y e comunidad. Mientrastanto tin casi 14 ciudad cu a tuma e initiativa aki over.
Minister Thijsen a bisa cu e initiativa aki sigur por ta interesante pa Aruba, unda cu tin hopi hoben den problema cu husticia y cu lo ta un tema cu sigur elo trece bou di atencion di Minister di Husticia Rocco Tjon. Segun e mandatario esencial ta e manera di traha; papia cu e hobennan pa tende kico nan mester pa keda riba e bon caminda. Hopi di e hobennan cu sr. Reedijk a papia cu nan, ta bisa cu nan kier un otro bida, pero no sa con pa logra esaki.
E tema aki, segun minister Thijsen, a bin na un momento cu Aruba y Hulanda ta papia riba reforma y e landspakketnan riba e tereno di salubridad, enseñansa y husticia y nan tur tin di haber cu otro.
Burgemeester Kolff a bisa di ta contento pa tende cu Aruba ta busca tereno pa coopera cu e municipionan y cu Dordrecht por profundisa e contacto cu Aruba y a bisa cu mas concreto un initiativa ta, e burgemeester por mira unda por duna sosten na esaki.
Minister Thijsen a gradici Burgemeester Kolff pa e recepcion y combersacion hopi ameno pa despues a entrega un regalo como recuerdo di e bishita di minister Thijsen na e burgemeester di Dordrecht.
