Minister Thijsen a bishita Rector di Universidad di Aruba Viola Heutger
Den Haag – Minister Plenipotenciario mr. Ady Thijsen a reuni cu rector di Universidad di
Aruba Viola Heutger. Durante di e combersacion a papia riba temanan cu ta regarda
Universidad di Aruba y tambe studiante. A papia riba cooperacion entre Universidad di
Aruba y Arubahuis y con esaki lo mester ta. Minister Thijsen a bisa cu como e ta alabes
Representante di Aruba na Union Europeo, lo por mira unda tin fondonan cu Universidad di
Aruba por haci uso dje. Ya caba Aruba ta haci bon uso di e Erasmusplus programma, cu ta un
programa di intercambio pa studiantenan di Universidad di Aruba.
E rector di Universidad di Aruba a trece dilanti cu lo ta importante pa bin cu encuentro of
charlanan pa studiantenan, sigur e prome tres lunanan ora cu nan ta na Hulanda. Minister
Thijsen a bisa di su persona tambe ta kere den encuentronan regular cu studiante pa asina
duna informacion, intercambia di opinion pa mira kico ta biba bou di nos studiantenan y na
final estrecha e laso entre e studiante y Arubahuis.
Sra. Heutger a añadi cu lo mester bin mas conocemento di tur e posibilidad di estudio na
Universidad di Aruba. Pa loke ta Hulanda lo mester bin mas data riba studiantenan y mas
intercambio cu e mentornan. Sra. Huetger a bisa cu Universidad di Aruba ta den pleno accion
pa mas studiante pa logra na Phd na Universidad di Aruba y asina brinda mas chens pa
investigacion. Tambe lo mester busca fondonan pa crea mas catedra (leerstoel).
Minister Thijsen a puntra sra. Heutger riba e posibilidad pa estudio pa enfermeria riba nivel
di HBO na Universidad di Aruba. Akinan sra. Heutger a bisa Universidad di Aruba ta en
busca di posibilidad pa trece un ramo di estudio asina na Universidad di Aruba den
combinacion cu un HBO scol na Hulanda.
Finalmente Viola Heutger a bisa cu Universidad di Aruba ultimo añanan a conoce un
crecemento remarcabel y a cera cooperacionnan cardinal, manera cu Katholiek Universiteit di
Leuven cu conhuntamente cu Universidad di Aruba a crea SISSTEM, cu ta “Sustainable
Island Solutions through Science, Technology, Engineering and Mathematics”.
Alabes Universidad di Aruba tin hopi bon experencia cu e Academic Foundation Year, cu ta
un programa di 1 aña unda e studiante ta ricibi preparacion prome cu e cuminsa cu un estudio
avansa
Por ultimo Viola Heutger a mustra riba e posibilidad pa studia na otro paisnan, manera
Alemania, unda un estudio avansa ta gratis y camber pa studiante ta hopi mas barata cu
Hulanda. Alabes mas estudio na Alemania tambe ta wordo duna den Ingles.
