Den Haag – Na Pulchri Studio a tuma lugar un recepcion di despedida pa Henk Brons como Director-General di Relacionnan di Reino na e ministerio di Asuntonan Interno y Relacionnan di Reino (BZK). Entre e invitadonan tambe tabata presente Minister Plenipotenciario Suplente di Aruba mr. Ady Thijsen. Na e ocacion aki sr. Thijsen a gradici sr. Brons – den nomber di Gobierno di Aruba – pa e cooperacion brinda durante cu e tabata director na BZK.
E programa a consisti di presentacion di e buki “Ongemak” scirbi door di Gert Oostindie y Wouter Veenendaal, sigi pa un discusion cu participacion di Ank Bijleveld, André Bosman, Francio Guadeloupe, Valika Smeulders y Glenn Thodé.
Henk Brons a cuminsa 43 aña pasa como redactor politico pa e corant “Het vrije Volk”. Su carera como ambtenaar a cuminsa como director di Voorlichting pa e ministerio di Enseñansa pa despues pasa pa RVD, cu ta e buro di informacion di Gobierno di Hulanda. Desde 2015 Henk Brons a ocupa e funcion di Representante di Hulanda pa Curaçao, St. Maarten y Aruba. Tres aña despues e ta keda nombra como Director-General pa Relacionnan di Reino na e ministerio di BZK.
