Dialuna 12 di september, a tuma luga un reunion unda a invita e grupo cu ta maneha Casnan di Cuido pa asina presenta ministerio di asuntonan di adulto mayor, su vision y maneho y asina tambe habri oportunidad pa dialogo mientras ta finalisa e maneho pa cu adulto mayor. 

A cuminsa na splica e situacion actual unda cu resultado di CENSO 2020 ta mustra cu na Aruba tin alrededor di 25.258 persona cu ta 60+, esaki ta forma 23% di e poblacion di Aruba. Sigur un grupo cu merece su debido atencion y compromiso for di gobierno.

Tambe a remarca cu na 2018, IVA(Inspectie Volksgezondheid Aruba) a hasi un nulmeting unda a resulta cu niun Cas di Cuido no tin permiso. E intencion no ta pa cera esakinan pero a enfatisa cu e proceso di permiso pa casnan di cuido tin prioridad halto pa e ministerio y ta spera di por regla cu tur cas tin permiso pa fin di e aña aki. 

Otro retonan cu e ministerio ta encontra cune pa cu e adultonan mayor ta financiamento di gastonan di cuido, capacidad di cama, infrastructura ekipa, malesanan cronico y loke e grupo di Casnan di Cuido tambe a trece dilanti, cual ta e necesidad di personal capacita. Sin lubida riba e participacion di e adulto mayor den su mesun cuido.

Tambe a elabora riba e metanan di Directie Ouderenzaken (unabes estableci) cual ta pa hisa accesibilidad na servicionann (di cuido), stimula participacion di Adultonan Mayor pa promove e calidad di cuido y bienestar (zorg en welzijn) den e grupo aki. Esaki ta nifica cu e rol di Dienst Ouderenzorg, lo bai cai bou Directie Ouderenzaken, esaki ta pa centralisa tur loke ta resorta bou nos adultonan mayor bou un solo capa. 

Den transcurso di september lo ta teniendo diferente reunionan cu grupo y organisacionnan cu ta aporta na bienestar di nos Adultonan Mayor, den cuadro di preparacionan pa cu Luna di Adulto Mayor, na October. 

Minister Arends ta gradici e Casnan di Cuido pa a atende e reunion aki unda a expresa e vision pa e cliente ta central y unda Casnan di Cuido ta brinda cuido di calidad, adecua y accesibel.

LEAVE A REPLY

Please enter your comment!
Please enter your name here