Dia 8 di juni nos ta celebra Dia Mundial di Oceano y nos ta enfoca ariba e tema di e aña aki cual ta ‘Tides are Changing’. Maske nos como humano ta depende masivamente riba nos oceano, nos no ta dun’e e atencion y cuido cu e merece. Esaki ta algo cu tin cu cambia y nos como rubiano, cu ta rondona di awa, mester ta mas consciente di kico nos lama ta nifica pa nos.
Nos oceano ta un fuente di rikesa cu ta para central den nos turismo, pesca y regulacion climatico. Nos ta orguyoso pa bisa cu cambio ta tumando luga caba riba nos isla cu e proyecto “Turning the Tide”.
“Turning the Tide”: Restaurando e Rifnan di Coral y Mangelnan di Aruba.
Fundacion Parke Nacional Aruba (FPNA), en colaboracion cu Wageningen University & Research, ScubbleBubbles, y University of Aruba, ta orguyoso pa hiba acabo “Turning the Tide”. Un proyecto piloto cu ta tuma accion pa rehabilita e rifnan di coral y mangelnan interconecta di Aruba. E proyecto di 15 luna aki ta co-financia pa RESEMBID y Wageningen University & Research, cu un fondo asigna pa yuda cambia e tendencia di degradacion medio ambiental y perdida di biodiversidad pa un bida marino saludabel y resistente pa Aruba. Durante su ehecucion y despues di su terminacion, e proyecto lo ta parti integral di e maneho di Parke Marino Aruba pa garantisa continuidad y impacto duradero pa e isla.
RESEMBID ta un programa di 48 proyecto financia pa Union Europeo y implementa pa Expertise France – e agencia di cooperacion pa desaroyo di Gobierno di Francia. Esaki ta sostene esfuersonan di desaroyo humano sostenibel den 12 Paisnan y Teritorionan Ultramarino di Caribe (OCT), incluyendo Aruba.
Segun informe di WWF su Living Planet Report 2022, America Latina y Caribe ta sufri un disminucion significante di biodiversidad en comparacion cu otro regionnan. E region a presencia un reduccion di 94% den biodiversidad entre 1970 y 2018. E di cinco y di seis informe nacional di Reino Hulandes pa e Convention on Biological Diversity (CBD 2014, 2019) tambe a resalta e situacion alarmante di bida marino den Caribe Hulandes, cu un status di conservacion insuficiente y sin cambio positivo cu por wordo midi. Estudioan realiza pa Aruba, manera e estudio TEEB (2018), a conclui cu e degradacion continuo di e bida marino no solamente tin impacto riba e sector di pesca local, pero tambe por reduci turismo y bienestar general cu 50%. Estudionan reciente a yega na e mesun conclusionnan (CBA2020, Oduber 2020, Alberts 2021). P’esey, ta crucial pa cambia e tendencia pa un bida marino saludabel y resistente unda actividadnan humano ta den harmonia cu naturalesa.
Conmemorando e Dia Mundial di Oceano, Minister di Naturalesa, Sr. Ursell Arends ta extende su mas sincero agradecimento na e fundacionnan y organisacionnan cu ta contribui incansablemente na e proteccion y preservacion di nos lamanan y e oceano en general. Sin lubida tur boluntario cu colectivamente a bira e bos di e oceano cu ta rondona nos dushi Aruba.
