Desde cu lansamento di e campaña di Limpi Limpi, diferente esfuersonan a wordo haci pa transiciona nos comunidad pa un maneho di desperdicio mas robusto y resiliente. Transicion pa yega na un economia circular unda desperdicio cu nos ta produci na Aruba por wordo procesa responsablemente y asina recupera mas material prima pa wordo reuza of recicla.
Minister Arends di comienso a bin ta bisa cu e maneho di desperdicio ta uno dinamico. Despues di 70 aña cu tabata benta sushi den aire liber pa wordo kima, awe nos por bisa cu nos ta progresando den e direccion corecto. Gobierno di Aruba a haci un inventarisacion di tur esnan cu por procesa desperdicio na Aruba, un mercado cu tin potencial y cu ta keda habri pa tur cu tin un plan concreto. Semper teniendo na cuenta cu hende, planeta y prosperidad. A identifica e sorto di desperdicio cu tabata yega na Dump Parkietenbos y a percura cu ciudadanonan tin caminda pa hiba esakinan. Y e mesun data ey a uza pa structura Baki den Bario su separacion.
Hunto cu diferente partnernan for di sector publico y sector priva a evalua datos, a considera experiencia di pasado y mas cu tur cos e logistica pa por haci un Baki den Bario posibel. E labor, e orario, e frecuencia, e localidad y hopi mas ta factornan cu a wordo tuma na cuenta pa por percura cu awe nos tin un structura cu ta conta cu capacidad pa atende cu e trabou rekeri. Pues e cantidad di desperdicio cu ta wordo deposita na Baki den Bario.
E vision a largo plaso semper tabata e Parke Circular permanente cu por wordo compara cu un Milieustraat. Actualmente e estudio di CAP(Circular Assessment Protocol) conduci door di Universidad di Georgia ta den su fase final. E estudio aki ta yuda nos compronde e miho manera pa separa desperdicio – sea plastic, papel of sushi organico etcetera – tambe lo identifica cua etapa di e proceso di “benta sushi afo”, e separacion mester tuma luga. Pa tur esaki ta rekeri un infrastructura adecua cu mester su tempo pa wordo realisa.
Mientrastanto cu e procesonan rekeri pa mehora e maneho di desprdicio na un manera structural y mas cu claro responsabel ta tumando luga, e exito di e iniciativa di Baki den Bario a amplia e cantidad di tipo di desperdicio cu ta wordo ricibi. Asina comunidad por a separa mas desperdicio pa wordo procesa, entre otro, taira, carton y azeta di cushina uza, alabes di e-waste, metal, desperdicio di construccion, green waste y bulk/mix waste.
Un otro desaroyo positivo di campaña ta cu a stimula y activa control social den comunidad como metodo fuerte pa re-establece balor y normanan cu ta dirigi riba cambio di habito y comportacion negativo den con ta anda cu desperdicio.
Na comienso di e iniciativa, Ministerio di Naturalesa a acerca Fundacion pa nos Comunidad(FPNC) pa tambe forma parti di Baki den Bario. Un colaboracion exitoso cu ta encurasha pa reuza. FPNC ta acepta diferente tipo di articulo entro otro comestibel, mueble y paña. Pa temporada di pasco FPNC ta colectando diferente producto di cuminda pa traha macuto di comestibel y yuda famianan den necesidad. Pa mas informacion por bishita nan pagina di Facebook, via nan website fpnc.aw of puntra y haci bo donacion personalmente cerca nan durante Baki den Bario.
E helpdesk di Serlimar tambe tabata t’ey durante tur Baki den Bario pa yuda nan clientenan.
Minister Arends ta haci un yamada na comunidad residencial henter pa e ultimo baki den bario. Esaki lo tuma luga den districto di Dakota diasabra awor 30 di november 2024 na Marlboro Ballpark. Minister Arends ta enfatisa cu e orario di e accion di Baki den Bario ta 7’or te cu 11’or di mainta. Pa mas informacion, por acudi na e website di Limpi.aw . Prepara bo desperdicio separa, pa facilita e fluho na e sitio. No lubida di colecta bo azeta di cushina uza den boter di plastic uza, cu tapa cera, pa asina esaki tambe por wordo recicla
Ta recorda comunidad cu absolutamente no ta acepta asbesto. Pone atencion cu ora haci uzo di e bakinan, e truck mester por tapa e baki cu e net pa e por cambi’e pa uno bashi pa mas hende por sigui tira. Pa percura cu e fluho di rotacion bai mihor ta pidi comunidad pa no yena e bakinan unda e no por wordo tapa cu net. Esaki ta ocasiona cu lo mester warda mas ainda pa pone e baki bashi. BCI y partnersnan t’ey pa guia pero ta pidi cooperacion di ciudadanonan tambe mirando cu tin mas cu 15 baki na e sitio cu constantemente mester wordo atendi cu ne pa wordo cambia.
Por ultimo, tene na cuenta cu mescos cu cualkier actividad grandi na Aruba, durante Baki den Bario tambe lo tin trafico y ta rekeri un tiki pasenshi. Ban nos tur aporta na tene nos Aruba limpi limpi.
