Minister di Turismo, Transporte y Labor mr. Wendrick Cicilia a realisa un bishita oficial na Aruba Ports Authority (APA) y a cera conoci cu e Hunta di Directiva, CEO di APA Marc Figaroa y demas ehecutivo- y empleadonan di e institucion. Durante e bishita Minister Cicilia a haya un presentacion detaya riba e operacionnan di APA, cu ta inclui dos terminal clave: un terminal pa procesa carga di container na Barcadera y un terminal na Oranjestad cu ta entrada y salida pa miles di turista crucero, ambos vital pa e economia di Aruba.
E presentacion a ofrece un bista amplio riba e retonan actual y oportunidadnan pa futuro den desaroyo di e zona portuario, particularmente e area strategico entre terminal di crucero turistico y Bushiri Beach. Minister Cicilia a keda impresiona cu e Masterplan ambicioso pa desaroya esaki como un area dinamico di crecemento economico, social y urbano: e proyecto Port City.
Minister Cicilia a expresa su aprecio pa e vision di APA, señalando cu e iniciativanan aki ta alinea perfectamente cu e rumbo strategico y sostenibel di Gabinete AVP-Futuro. E zona cu a keda habri despues di e traslado di waf pa Barcadera ta un area prometedor pa transformacion. Su potencial economico-social-financiero ta indiscutibel, pero mester desaroya esaki den beneficio directo pa pueblo Arubano. P’esey, Minister Cicilia a haci un yamada pa garantisa cu tur paso den desaroyo di Port City ta tuma cu transparencia, dialogo y respet pa e deseo y pensamento di comunidad.
