Minister di turismo, Transporte y Labor mr. Wendrick Cicilia ta anuncia un paso significativo den direccion di modernisacion e mercado laboral di Aruba, enfatisando e importancia di data pa formula manehonan cu ta atende tanto e necesidadnan actual como tambe esunnan di futuro.
Den e cuadro aki, Minister Wendrick Cicilia a reuni cu expertonan di Economische Bureau Amsterdam pa coordina e desaroyo di un modelo cu lo pronostica e necesidadnan di mercado laboral na Aruba. E iniciativa aki ta representa un innovacion significativo den maneho laboral, posicionando Aruba entre e poco teritorionan denter di Reino Hulandes cu tin un herment asina.
E modelo aki lo centralisa e datonan cu ta distribui actualmente entre varios entidad manera DAO, DPL, DEZHI, DSA, DIMAS y SVb, facilitando un bista amplio di e mercado laboral. E herment aki lo haci posibel pa identifica e retonan, anticipa e necesidadnan pa sector y guia miho e forsa laboral den futuro pa loke ta trata e oportunidadnan existente.
“Pa construi un mercado laboral fuerte, nos mester depende riba datonan concreto. E modelo aki lo permiti nos tuma decisionnan miho informa y prepara miho pa futuro”, asina Minister Wendrick Cicilia a duna di conoce.
E siman aki, e expertonan a reuni cu diferente stakeholder cu a demostra un actitud positivo cu e iniciativa aki. Ta anticipa cu e modelo preliminar aki lo ta cla pa luna di juni.
Cu e stap aki, Ministerio di Labor ta reafirma su compromiso pa un maneho mas eficiente, strategico y dirigi riba e futuro di mercado laboral na Aruba.
