Awe t’e dia cu Gabinete AVP-FUTURO ta activa e vibracion positivo bek den Caya Grandi. Despues di un periodo di abandono, a yeg’e momento pa rebiba nos centro di ciudad. Apart cu Ministerio di Turismo y Oficina di Turismo ta sostene e proyecto di Ban Bek Caya, pa Minister mr. Wendrick Cicilia, Caya Grandi tin un balor sentimental p’e. Mayoria di nos a crece ta bishita Caya Grandi, pa sea pasa un rato ameno den Caya of simplemente pa haci compras.
Minister Cicilia a indica cu un di e puntonan di enfoke den e programa di gobernacion AVP-FUTURO, ta pa rebiba, revitalisa y crea bida den caya principal. Ban Bek Caya ta un esfuerso colectivo entre tres ministerio y ATA. Minister di Economia, mr. Geoffrey Wever y Minister di Asuntonan General, mr. Mike Eman ta reconoce e importancia di traha hunto cu Ministerio di Turismo den e proyecto Ban Bek Caya caminda lo integra turismo y nos comunidad den nos centro di ciudad.
A yeg’e dia caminda lo mir’e fruto di e cooperacion entre sector publico y sector priva. Den preparacion pa e evento aki, gobierno a organisa un ‘stakeholders meeting’, caminda a topa cu mayoria di e comerciantenan di Caya Grandi. Locual a resalta durante e encuentro aki: t’e amor cu e inversionista- y comerciantenan tin pa Caya Grandi. Nan ta kere den e potencial di caya.
Pa conecta e evento na turismo, Minister Cicilia a subraya cu ta imporante pa crea plataforma caminda nos ‘micro-impresarionan’ por ofrece nan producto y servicio n’e publico presente. Tin como trinta tent caminda por sostene nos empresarionan local door di tanto cumpra pero expone nan tambe riba e plataformanan social. Aki rato, unabes nos activa e vibracion positivo bek den Caya Grandi, comunidad y turismo lo topa otro den union, den Caya Grandi y pa experencia un poco di “e producto Aruba”. Nos cultura, nos aspecto culinario, exposicion di arte, presentacion di nos artistanan local y iluminacion riba nos monumentonan ta poco di locual lo experencia awe tardi, cuminsando for di 6:00 pm den Caya Grandi.
Pa Minister di Turismo, mr. Wendrick Cicilia, tur locual cu lo biba durante e evento Ban Bek Caya ta forma parti di e vision di ‘community based tourism’, caminda cu a traves di turismo ta financia proyecto bunita pa crea espacio pa nos ‘micro-impresarionan’ pero hunto cu esey eleva e experencia pa nos turistanan biba e autenticidad di nos dushi isla, Aruba. Na final, Minister Cicilia a finalisa bisando: “E momento pa rebiba Caya Grandi ta AWO”.
