Diabierna merdia, Minister mr. Wendrick Cicilia hunto cu Minister drs. Rene Herde tabata presente riba waf di carga na Barcadera pa topa cu ehecutivonan di Aruba Stevedoring Company (ASTEC). Durante e bishita nan a cera conoci cu e parti operacional di e compania, un parti vital di nos economia.
Tur producto importa ta pasa a traves di ASTEC y di nos waf. Tur e partinan di logistica y operacional cu ta garantisa cu esaki ta yega den e curason di nos economia ta sosode na ASTEC.
“Locual cu ta yena nos cu satisfaccion ta cu e parti operacional ta maneha pa nos propio hendenan”, asina mr. Wendrick Cicilia a expresa.
Un 90% di e actividadnan cu ta sosode riba e tereno di waf di carga na Barcadera ta encarga pa nos propio profesionalnan local. Importante pa destaca cu ta reconoce den Caribe como un di e miho wafnan pa descarga barco.
Por mira un tempo di “turn over” di apenas 5 minuut, cu ta e tempo cu un compania di carga ta tuma pa saca un container for di tereno di waf. Anualmente ta procesa alrededor di 350 barco di carga pa aña, cu hunto ta trece como 20.000 container pa Aruba.
Locual ta importante pa subraya ta cu esaki ta cosecha di Gabinete Mike Eman I & II cu tabatin e vision pa traspasa e waf pa descarga barco for di Oranjestad pa Barcadera.
ASTEC ta un compania forma pa tur e companianan di descarga y procesa carga cu tabata operacional riba waf na aña 1983. Nan tur a uni y forma un solo compania. ASTEC ta opera bou direccion di un profesional Rubiano, Christopher Lake.
