Mirando cu durante casi ocho aña largo e ex-Minister di Turismo tabatin semper prioridadnan robes, a pone cu un lista largo di atraccionnan turistico a keda sin mantencion. Ta promove pa atrae turistanan di calidad, pero no a traha riba e infrastuctura turistico di nos pais. Cu cambio di gobernacion, a bin tambe cambio den maneho y a percura pa tin prioridadnan corecto pa cuadra cu e maneho di hisa e calidad di turista cu nos ta atrae. Hunto cu ATA, a traha riba e lista di prioridadnan y un di nan sin duda, tambe pa nos localnan, a bira renobacion di e facilidadnan na Rodgers Beach.
Rodger’s Beach ta un luga recreativo di gran balor pa comunidad local y bishitantenan, ofreciendo un espacio pa relaha, landa y disfruta di diferente actividadnan di ‘leisure’. E pier y e plataforma pa sambuya ta caracteristicanan iconico di e beach. Pa motibo di desgaste natural, exposicion prolonga na condicionnan di tempo y elementonan natural, pero tambe e ambiente marino, e structuranan aki a deteriora gradualmente, loke a crea e necesidad pa trabounan di mantencion y restauracion. P’esey awor Minister Wendrick Cicilia a aproba un presupuesto pa e proyecto di mantencion general y restauracion cu ta enfoca riba e pier. Tambe lo restaura e plataforma pa sambuya cu enfasis riba fortifica e structuranan y mehora nan resistencia den e ambiente marino. Meta di e iniciativa aki ta sigura cu tanto comunidad como bishitantenan por sigui disfruta di Rodger’s Beach den un ambiente sigur y bon manteni.
E facility building actualmente ta den mal estado structural y lo bash’e abou y construi uno di nobo. E construccion di e facility building na Rodger’s Beach a cuminsa e siman aki, cu un duracion di aproximadamente 60 dia laboral. Ademas, e area rond di e edificio lo inclui plantacion di matanan Seagrape nativo (Cocoloba Uvifera). E especie nativo aki ta adapta bon na e ambiente di costa y ta apoya practicanan responsabel di maneho di tereno, mientras cu ta preserva e caracteristica di e area.
“E lista ta largo pasobra e periodo di deterioro sin un maneho coherente di mantencion tambe tabata demasiado largo. Nos ta comprometi pa haci un inhaalslag awor pa drecha mas facilidad cu nos por. Y hasta e tikinan cu a haci den e gobernacion anterior, casi tur ta den mal estado caba pa e mesun motibo di falta di mantencion continuo. Mester ta cla pa tur envolvi, ta masha facil bisa cu kier eleva calidad di bishitante cu ta yega nos isla, sin cu tin un maneho apropia pa garantisa cu nos ta surpasa e expectativa di cada bishitante. Nos trabou no ta solamente trece nan, sino percura pa ora nan t’ey nan keda satisfecho y cu plan pa regresa. A aloca awo basta fondo pa por drecha tur loke cu a bay atras durante e casi ocho añanan di mal maneho y di tin prioridadnan robes”, asina Minister Wendrick Cicilia a termina bisando.
