Minister di Turismo,Transporte y Labor, mr. Wendrick Cicilia tabata presente na un momento hopi special na Hilton Aruba Caribbean Resort & Casino, pasobra a honra bintitres empleado cu a ricibi reconocemento pa nan añanan dedica na turismo di Aruba. Hilton Aruba Caribbean Resort & Casino a reconoce su empleadonan cu a cumpli 25, 30 y 35 aña di servicio den e sector di hospitalidad y turismo, hunto e 23 empleadonan ta representa 660 aña di experiencia.
Na momento cu Minister Cicilia a dirigi su mes na esnan presente, el a remarca cu locual ta haci Aruba diferente ta e calor y esencia di nos hendenan. Nos capital humano ta garantisa e exito di nos turismo. E mandatario a dedica algun palabra cu ta honra e añanan di excelencia den servicio di e empleadonan cu a dedica nan bida na turismo.
Minister Wendrick Cicilia a resalta cu esaki nan ta nos heroenan scondi, esnan cu nan trabou diaramente ta garantisa cu nos bishitantenan ta bay cu un experencia di Aruba cu ta agradabel y unico.
Minister Cicilia a e resumi su maneho di turismo den e siguiente palabranan dedica na e empleadonan: “E curason di nos economia ta turismo y e wesi’ lomba di turismo ta nos hendenan. Ban sigui celebra nos hendenan cu ta haci e turismo di Aruba uno extraordinario.”
