Minister di Turismo, Transporte y Labor, mr. Wendrick Cicilia, tabata presente na Aruba Global Travel Conference organisa pa Aruba Tourism Authority, un conferencia cu a reuni representantenan local y internacional pa intercambia conocemento, identifica oportunidadnan y dialoga tocante futuro di turismo di Aruba.
Durante su discurso, Minister Cicilia a destaca cu turismo ta e historia di exito mas impresionante di Aruba. E sector ta profundamente conecta cu nos comunidad y economia, generando oportunidad pa miles di trahado y empresario local.
Sinembargo, como un destinacion turistico madura, Aruba mester adapta su maneho na e desafionan actual. Entre esakinan tin e presion riba mobilidad, espacionan publico, mercado di vivienda y mercado laboral. Minister Cicilia a enfatisa cu Gobierno di Aruba su rumbo ta cla: “Mas prosperidad, menos presion.”
E mandatario a splica cu e enfoke no por ta solamente riba atrae mas bishitante, sino riba atrae e bishitante corecto, crea mas balor y percura pa henter comunidad sinti e beneficionan di turismo. Esaki ta inclui mas conexion entre bishitantenan, experiencianan local y empresarionan Rubiano.
“Nos prosperidad turistico mester crece mas lihe cu e actividad turistico. Nos meta ta un turismo di mayor balor, cu ta beneficia nos pueblo y na mes momento, proteha loke ta haci Aruba unico,” Minister Cicilia a expresa. E conferencia tambe a brinda un momento special pa reconoce personanan cu, mediante nan dedicacion y hospitalidad, ta contribui na calidad di nos producto turistico.
Minister Cicilia ta felicita Maidel Yero, Jandor Lampe y John Kelly pa nan nominacion como “Heroe Local”. Nan compromiso, servicio y amor pa Aruba ta representa e calidad humano cu ta duna nos destinacion su caracter unico. Pa finalisa, Minister Cicilia a invita tur socio di industria turistico pa sigui fortalece cooperacion, brasa innovacion y traha hunto pa un turismo cu ta genera prosperidad pa nos pueblo, mientras nos ta proteha e autenticidad di Aruba.
