Diaranson atardi, durante e ceremonia di registracion pa Aruba Hi-Winds 2025, un evento historico a tuma luga riba e beach di Fisherman’s Hut. Den presencia di famia, invitadonan, fanaticonan di windsurf y kitesurf, Gobierno di Aruba a desvela oficialmente e nomber nobo di e area: Sarah-Quita Beach, na honor di nos orguyo nacional, campeona mundial Sarah-Quita Offringa.
Prome Minister Mike Eman, Minister di Deporte Gerlien Croes, Minister di Turismo Wendrick Cicilia, y CEO di ATA Ronella Croes, a hiba palabra pa honra e trayecto extraordinario di Sarah-Quita, un Arubano cu ta representa nos isla cu excelencia, humildad y pasion riba e podium internacional.
Sarah-Quita no ta solamente un atleta di nivel mundial, sino un simbolo di perseverancia, determinacion y amor pa Aruba. E tributo aki ta un mensahe poderoso pa cada hoben Arubano cu dedicacion, pasion y fe, tur cos ta posibel.
Minister di Turismo Cicilia, a expresa cu p’e personalmente e ceremonia tabata un momento special mirando cu e ta hiba casi e mesun edad cu Sarah-Quita, y e reconocemento como un leyenda na un edad asina jong, ta un inspiracion p’e, y un inspiracion pa e generacion cu awe ta wak cu no obstante e edad jong, e talento cu Dios a bendiciona Sarah-Quita cu n’e, ta sirbi como inspiracion pa nos comunidad, e siguiente generacion y nos pais.
Cabey Busha, manera e ta conoci den e comunidad di windsurf, a keda emociona cu e gran honor aki y a gradici di curason e Gobierno AVP-Futuro pa e reconocemento aki.
E ceremonia na Sarah-Quita Beach ta parti di e mision di Gobierno AVP-Futuro pa celebra talento local, fortifica nos identidad nacional, y motiva e siguiente generacion pa persigui nan soñonan.
