Den cuadro di un bishita oficial na Aruba, Minister di Desaroyo Economico di Corsou, Roderick Middelhof, tabatin un reunion cu Minister di Turismo, Transporte y Labor mr. Wendrick Cicilia y Minister-president Mike Eman.
Durante e reunion, e ministernan a atende riba diferente tema strategico enfoca riba fortalecemento di colaboracion regional. Un di e puntonan principal tabata e necesidad pa mehora conectividad aereo entre Aruba y Corsou, reconociendo su importancia pa mobilidad, turismo y integracion economico.
Tambe a trata e tema di desaroyo y modernisacion di aeropuerto, como un pilar importante pa sostene crecemento y optimalisa experiencia di e bishitantenan. Den mesun contexto, a enfatisa e balor di colaboracion entre e oficinanan di turismo di Aruba y Corsou, cu e meta pa fortalece mercadeo, diversificacion di mercadonan y posicionamento di e destinacionnan.
Ademas, e ministernan a atende e problematica di AirBNB, subrayando e necesidad pa un maneho balansa cu ta proteha e comunidad local mientras cu ta mantene un sector turistico competitivo.
E reunion a reafirma e compromiso di Aruba y Corsou pa sigui traha hunto riba solucionnan concreto y sostenibel, cu lo contribui na un desaroyo economico duradero den region.
###
