Aruba y Corsou a dal un paso importante pa fortalece cooperacion regional cu firmamento di un Memorandum of Understanding (MOU) enfoca riba desaroyo di turismo, conectividad, siguridad di turismo y crecemento economico sostenibel.
E acuerdo ta firma pa Minister di Turismo, Transporte y Labor di Aruba, mr. Wendrick Cicilia y Minister di Desaroyo Economico di Corsou, Roderick Middelhof y ta establece un cuadro pa un colaboracion mas estrecho entre e dos islanan durante e proximo tres añanan.
E MOU tin como meta pa promove e intercambio di conocemento, experticio, miho practicanan y informacion den areanan clave manera desaroyo di turismo, maneho di destinacion, conectividad aereo y maritimo, siguridad turistico, sostenibilidad, investigacion y desaroyo di capital humano.
Un componente central di e acuerdo ta e ambicion comparti pa explora oportunidadnan pa un Iniciativa di Turismo Multi-Destinacion di Caribe Hulandes, posicionando Aruba y Corsou como destinacionnan complementario mientras ta conserva e identidad unico, cultura y marca turistico di cada isla.
Pa medio di e colaboracion aki, ambos pais lo explora e oportunidadnan pa fortalece airlift, mehora mobilidad entre islanan, sostene e esfuersonan conhunto di promocion di turismo den mercadonan internacional selecta y curasha e bishitantenan pa experencia diferente destinacion denter di Caribe Hulandes.
Tambe e acuerdo ta percura pa un plataforma pa cooperacion entre Aruba Tourism Authority (ATA), Curaçao Tourist Board (CTB), aeropuertonan, aerolineanan, operadornan di crucero, asociacionnan hotelero y otro stakeholdernan di turismo. Iniciativanan potencial ta inclui campañanan di mercadeo conhunto, experiencianan di biahe combina, esfuersonan di marca di destinacion y programanan cu ta curasha estadianan mas largo di bishitante y aumento di gastonan di turismo.
Minister Wendrick Cicilia a enfatisa e importancia di colaboracion regional den un panorama turistico mundial cu ta bira mas y mas competitivo.
“Aruba y Corsou ta comparti lasonan historico, cultural y economico profundo. Pa medio di e acuerdo aki, nos ta creando oportunidadnan nobo pa fortalece nos sectornan turistico, mehora conectividad entre nos islanan y explora maneranan innovativo pa engrandece e experiencia di bishitante. Door di traha hunto caminda e tin sentido, mientras ta mantene nos identidadnan individual, nos por crea nos competencia y oportunidadnan economico grandi pa nos hendenan.”
Ademas di promocion y conectividad di turismo, e MOU ta pone enfasis fuerte riba desaroyo di turismo sostenibel, siguridad di turismo, conservacion di medio ambiente, resiliencia di clima, preservacion cultural y diversificacion di producto turistico.
E acuerdo tambe ta curasha cooperacion den investigacion di turismo y intercambio di informacion, desaroyo profesional, oportunidadnan di entrenamento y edificio di capacidad institucional pa sostene e crecemento y resiliencia a largo plaso di e industria di turismo na ambos pais.
E Memorandum of Understanding (MOU) ta refleha e compromiso comparti di Aruba y Corsou pa fortalece e cooperacion regional, fomenta crecemento turistico sostenibel y crea oportunidadnan nobo cu ta beneficia localnan, negoshinan y bishitantenan.
E acuerdo a drenta na vigor despues di firma y ta destina pa guia cooperacion entre ambos pais pa un periodo inicial di tres aña.
