Ministerio di Finansa, Asunto Economico y Sector Primario, mr. Geoffrey Wever ta orguyoso pa anuncia e di tres edicion di e San Nicloas Pop-up Market, e mercado mensual cu ta tuma luga na Plaza Lolita na San Nicolas.

E di tres edicion di e Pop-Up Market lo tuma lugar diasabra awo 22 di november di 9or di mainta te 2or di atardi riba Plaza Lolita na San Nicolas. E edicion aki ta conta cu mas di 45 vendor local entusiasma. Bishitantenan di e mercado lo por encontra arte y artesania, producto local, dino jump pa e muchanan, cuminda y bebida. Lo bay tin area nan cu sombra pa e bishitantenan por sinta disfruta di e ambiente exceptional cu tin na e mercado.

“E mercado aki ta stimula economia local, ta ofrece un plataforma na empresarionan y productornan local, y ta sirbi como un paso importante pa e mercado nobo cu lo wordo realisa como parti di e revitalisacion di San Nicolas. Mi ta contento pa mira cu cada edicion a crece y cu e comunidad ta yegando pariba pa sostene e vendors local,” minister Wever a enfatisa.

“Mi ta hopi contento pa wak cu e biaha aki Marriott cu Kukoo Kunuku lo trece turistanan di Marriot pa San Nicolas pa experiencia e Pop-up Market. Tambe cu Kibrahacha lo trece un bus cu adulto mayor pa experiencia e Pop-up Market. Y tambe cu Secrets Hotel atrobe lo percura pa tin transporte entre Secrets Hotel y centro di San Nicolas pa nan guestnan por experiencia e Pop-up Market”, segun Minister Geoffrey Wever.

E apoyo pa e mercado ta completamente den linea cu e Programa di Gobernacion di Gabinete AVP-Futuro, cu ta pone prioridad pa stimula e sector primario y desaroyo economico na San Nicolas.

Ministerio di Finansa, Asunto Economico y Sector Primario ta invita tur residente y bishitante di Aruba pa yega na e mercado diasabra awor y contribui na e crecemento di nos economia local y na e fortalecemento di e comunidad di San Nicolas.