Minister Geoffrey Wever a tene un reunion cu su homologo di Surinam, Minister di Finansa y Planificacion S.E. sra. Adelien Wijnerman durante e reunionnan anual di IMF y World Bank na Washington D.C.. Un di e topiconan cu a ser acorda ta pa inicia e negociacionnan pa yega na un tratado fiscal entre Aruba y Surinam (belastingverdrag).
E topico di tratado fiscal, ta un cu Minister Wever a trece dilanti durante di e mision comercial pa Surinam cu e a lidera na juni 2024. E mision comercial, cu a conoce un delegacion di sector priva di Aruba amplio a bay cu e meta pa stimula comercio pero tambe pone un base solido pa futuro colaboracionnan cu lo fortifica e economianan di Aruba y Surinam.
Esey a resulta den e firmamento di un Memorandum of Understanding (MoU) na october di 2024, unda Aruba y Surinam a confirma nan aspiracionnan pa promove cooperacion entre e dos paisnan. Na juni 2025, e conseho di ministers di Aruba di Gabinete AVP-Futuro riba peticion di Minister Wever a aproba pa Aruba cuminsa e trayectorio pa yega na un tratado fiscal cu Surinam.
E intencion di e tratado fiscal ta cu riba e mesun entrada lo no paga impuesto dos biaha. Esaki ta bay stimula comerciantenan di ambos Aruba y Surinam pa amplia e comercio y e tratado ta contribui na e interesnan economico di Aruba y Surinam y ta garantisa siguridad huridico.
Minister Wever ta wak e concretisacion di e tratado fiscal como un punto clave cu ta hiba for di e Ministerio di Finansa, Asuntonan Economico y Sector Primario unda ta traha na un regimen fiscal atractivo pa negoshinan local y pa atrae inversionistanan internacionalmente.
“Surinam tin hopi oportunidad pa nos empresarionan, por ehempel e exploracion di “oil and gas” ta representa un oportunidad pa nos empresanan tecnico, pero tambe e sector financiero ta un oportunidad. E tratado entre Aruba y Surinam lo aporta tambe na importacion di fruta, berdura y material di construccion for di Suriname”, segun Minister Geoffrey Wever.
