Dialuna ultimo, Minister Geoffrey Wever tabata den Parlamento pa asina debati riba e topico di e impacto cu e guera rond mundo tin riba Aruba. Segun e minister no tin motibo pa panico, pasobra economia, finansas y turismo di Aruba ta bayendo bon. Por cierto, esaki ta confirma un biaha mas cu Gabinete Wever-Croes a maneha Aruba na un bon forma, y a laga e economia, finansas y turismo riba un bon nivel.
Durante e debate aki, Parlamentario Dangui Oduber a bin cu un critica fuerte contra e minister aki, bisando cu awor caba sin cu tin efectonan di guera, costo di bida ta halto. Ultimo simannan comunidad por a nota un subida den varios prijs di producto, sin lubida e prijs di gas cu Minister Geoffrey Wever mes a subi si ningun dia duna cuenta riba esaki. Esaki sigur ta di lamenta mirando cu e gobierno AVP-Futuro a gana eleccion basa riba e promesa di baha costo di bida, y awe 6 luna despues di eleccion, ni un plan nan por presenta.
Basa riba e critica aki, Minister Wever, cu no a gusta e comentario aki y tabata irita, a indica cu ta Parlamento, specificamente oposicion ta stroba gobernacion. Riba esaki, lider di oposicion, Evelyn Wever-Croes, a reacciona contestando cu e Parlamento aki, specificamente oposicion, ta haci nan trabou manera nan a priminti. Haci pregunta na gobierno ta un derecho constitucional y un deber pa cu pueblo. Y ta gobierno su deber pa contesta, y no keha cu nan ta wordo stroba.
Ademas, no ta Parlamento of oposicion ta stroba gobernacion, e partidonan AVP y Futuro mes ta parse di no kier goberna, y nan mes ta strobando nan propio gobernacion, sin cu oposicion mester yuda nan den esaki. Fraccion di MEP a haci varios pregunta na e gobierno aki, riba diferente tereno, di cual apenas algun a haya contesta. Na e momento aki e fraccion ta wardando riba contesta di mas di 600 pregunta, algun haci desde februari y maart, tempo cu Geoffrey Wever ainda tabata minister di economia den e gabinete anterior. Pues e minister aki tin mas di 4 luna sin contesta un pregunta. Esaki ta un falta di respet y di transparencia.
“Laga mi recorda e Minister aki cu su partido a pone den nan programa di campaña cu nan lo contesta preguntanan di Parlamento den dos (2) siman. Pero e realidad ta cu nan no a contesta nada den dos siman, y ni den dos luna. Esaki ta un muestra clave cu pa partido Futuro campaña ta un cos y goberna ta otro cos.
Tambe, den nan acuerdo di gobernacion di AVP y Futuro, nan a compromete riba pagina 9, cu nan lo contesta preguntanan den e termino cu Parlamento ta pidi. Nos fraccion a pidi pa haya contesta den 2 pa 3 siman, pero nan no ta cumpliendo cu esaki. Ya awor ta lunas despues di eleccion y ainda nos no tin un gobierno completo. Loke nos a bin ta mira den e gobernacion aki si ta varios snoepreisjes y persecucion politico. Ta tempo pa Aruba haña un gobierno completo, bon of malo, pero no por warda mas”, Lider di MEP Evelyn Wever-Croes a duna di conoce.
